Жаңа салықтық реформа кәсіпкерлерді қолдауға бағытталуы тиіс — депутат

Мемлекет басшысы Қасым-Жомарт Тоқаев отандық бизнес өкілдерімен кездесуде Үкіметке қосымша құн салығы (ҚҚС) мәселесін тағы да пысықтауды тапсырды, деп хабарлайды Egemen.kz.
Президент кез келген реформаны жан-жақты сараптап, байыппен жүргізу қажеттігін атап өтті. Бұл ретте ҚР Парламенті Сенатының депутаты Геннадий Шиповских экономика салаларының ерекшеліктерін ескере отырып, түрлі нұсқалар әзірлеу маңызды екеніне тоқталды.
«ҚҚС мөлшерлемесі сараланып белгіленуі тиіс. Бұл шешім білікті сарапшылардың, кәсіпкерлердің және депутаттардың пікіріне құлақ аса отырып, нақты есептеулер негізінде қабылдануы қажет. Қазіргі ұсынылған мөлшерлеме тым жоғары. Бұл қоғамда қызу талқыланып, түрлі пікірталас тудырды. Дегенмен, бұл алдын ала қарастыруға ұсынылған нұсқа екенін ескеру керек. Сондықтан Үкіметтің бұл бағыттағы жұмысы бизнес, қоғам, кәсіпкерлер және сарапшылармен бірлесе отырып жасалуы тиіс», деді депутат.
Оның пікірінше, Үкімет, мықты сарапшылар және депутаттар бұл мәселені мұқият талдап, дұрыс шешім қабылдауы қажет.
«Мақсат – тиімді шешім табу. Яғни бизнеске кедергі келтірмейтін, қолайлы жағдай жасайтын, сонымен қатар салық тәртібін күшейтіп, бюджет кірісін арттыратын оңтайлы жолды анықтау. Президенттің бұл пікірі және ұсынысы өте орынды. Себебі жаңа салықтық реформа ел экономикасына тиімді болып, ең бастысы – қарапайым кәсіпкерлерге кедергі емес, керісінше қолдауға бағытталуы қажет», деді Геннадий Шиповских.