Жаңа бағдарлама жаңашылдыққа бастайды

Күлпаршын АЙДАРХАНОВА,
Облыстық мәслихат депутаты,
“Ақбөбек” халықаралық мектебінің құрылтайшысы.

Мемлекет басшысы әрдайым өз Жолдауларында білім саласын дамытуға, оның ішінде жас ұрпаққа сапалы білім мен тәрбие беруге ерекше көңіл аударады. Бүгінгі Бурабайда өткен ІV Ұлттық құрылтайда Президентіміз білім саласына кеңінен тоқталды.
Қасым-Жомарт Тоқаев республикамыздағы бірқатар мектептерде “Біртұтас тәрбие” бағдарламасы қолға алынғанын, енді осы тәжірибені барлық мемлекеттік білім ошағына енгізу керектігін атап өтті.
“Бұл құжатты алдағы уақытта жекеменшік мектептер де басшылыққа алуға тиіс. Себебі тәрбие жұмысы балаларды түгел қамтуы қажет. Сонда ғана бұл бастама жалпыұлттық ауқымға ие болады”-деген Мемлекет басшысы алдағы уақытта осы бағдарламаны «Адал азамат» деп атау ұсынылғанын, бұл ұсынысты қолдайтынын жеткізді.
Шынында да, бұл бағдарламаның жас ұрпаққа берері мол, себебі мақсаты— отаншыл, білімді, жасампаз ұрпақ тәрбиелеу.
Бұл бағдарлама алдағы уақытта біздің оқу орындарында да жүзеге асырылады.
Мәселен, бүгінде Ақтөбе қаласындағы “Ақбөбек” халықаралық мектебінде 820 бала оқып, білім алып жатыр. Мұнда дарынды балалардың сапалы білім мен тәрбие алуына барлық жағдай жасалған. Соңғы үлгіде салынған мектепте оқуға қажетті құрал-жабдықтар, арнайы кабинеттер бар. Балалар мұнда қосымша біліммен де қамтылған. Сондай-ақ былтыр ауылдық жерлерде тұратын дарынды, талантты балаларға арналып “Ақбөбек” лицейі де ашылды. Мұнда қазір 230 оқушы оқып, ІТ саласын меңгеріп жатыр. Жалпы, алдағы уақытта біздің аталған оқу орындарымыз балалардың жаңашылдықтарды үйреніп, белгілі бір саланы меңгеріп шығуына басымдық беретін болады. Бұл орайда алға қойған жоспарларымыз көп.