Жаңа жылдық ертеңгілік

*Жаңа жыл – мейірім мен қуаныштың мерекесі*
Жаңа жыл – үміт пен шаттықты, мейірім мен ізгілікті қатар ала келетін ерекше мереке. Осы игі ұғымдар 26 желтоқсан күні Темірбек Жүргенов ауылында өткен әсерлі Жаңа жылдық ертеңгілікте айқын көрініс тапты. Шара Отбасын қолдау орталығының ұйымдастыруымен және «West Gold Mining Limited» жеке кәсіпорнының қолдауымен жоғары деңгейде өтті.
Мерекелік кешке аудан орталығынан, сондай-ақ Талдысай мен Қарабұтақ ауылдарынан келген ерекше қолдауды қажет ететін балалар қатысып, шынайы қуаныш пен жүрек жылулығына бөленді. Балалар үшін арнайы әзірленген қызықты ойындар, көңілді бағдарламалар олардың жүздеріне күлкі ұялатып,көңілдеріне шаттық сыйлады.
Ертегідей әсер сыйлаған Аяз ата мен Ақшақардың келуі балалардың қуанышын еселей түсті. Сиқырлы сәттерге толы бұл кездесу кішкентай қонақтардың мерекелік көңіл-күйін одан әрі арттырып, Жаңа жылға деген сенім мен үмітті күшейтті.
Шараға арнайы қатысқан «West Gold Mining Limited» ЖК директорының орынбасары Дәрмен Рахимов балаларды жаңа жыл мерекесімен құттықтап, тәттілер мен арнайы сыйлықтарды табыстады. Бұл ізгі ниет балалардың жүрегіне жылу ұялатса, компанияның әлеуметтік жауапкершілік пен қайырымдылықты басты құндылық ретінде ұстанатынын айқын көрсетті.
Осындай тағылымы мол, жүрекке жылу сыйлайтын шаралар – қоғамдағы ізгілік пен адамгершіліктің жарқын көрінісі. Балаларға қуаныш сыйлап, олардың көңіліне үміт ұялатқан барша ұйымдастырушыларға, демеуші болған жандарға ата-аналар мен орталық ұжымы,ерекше сыйға ие болған балалар шынайы ризашылықтарын білдірді.
Жақсы үрдіс өз жалғасын таба береріне сенеміз. Ал, балалардың қуанышы-өмірдің нұрлануы.
Е. ЫРҒЫЗҰЛЫ