Мемлекет басшысы отаншылдық ұғымының мәніне терең тоқталып, оның тек сөзбен шектелмей, нақты іс пен жауапкершілік арқылы көрінуі керектігін атап өтті.

Мемлекет басшысы отаншылдық ұғымының мәніне терең тоқталып, оның тек сөзбен шектелмей, нақты іс пен жауапкершілік арқылы көрінуі керектігін атап өтті. Президенттің айтуынша, отаншылдық – Отанды сүюмен ғана өлшенбейді, ол ел алдындағы перзенттік парызды сезініп, жауапкершілікпен қызмет ету арқылы айқындалады.
– Отаншылдық дегеніміз – әрине, Отанға деген сүйіспеншілік. Алайда Отан алдындағы жауапкершілігіңді сезініп, перзенттік парызыңды өтеуге талпынбасаң, «отаншылмын, патриотпын» деген сөзіңнің құны көк тиын болмақ, – деді Қасым-Жомарт Тоқаев.
Президент қоғамда соңғы уақытта Қазақстанның Мемлекеттік Туын қолдану тәртібіне қатысты өзекті мәселе көтеріліп отырғанына да назар аударды. Мемлекеттік рәміздер – елдің тәуелсіздігі мен егемендігінің айқын белгісі болғандықтан, оларды пайдалану арнайы заң нормалары мен нақты ережелер арқылы реттелетінін атап өтті.
– Мемлекеттік рәміздерді пайдалануға жеңіл-желпі, салғырт қарауға болмайды. Бұл – әр азаматтың елге деген құрметінің көрінісі. Заң талабы әрдайым орындалуға тиіс, – деді Мемлекет басшысы.
Осылайша Президенттің бұл пікірі отаншылдықты тек ұран деңгейінде емес, заңға құрмет, тәртіпке бағыну және елдік құндылықтарды қастерлеу арқылы дәлелдеудің маңызын айқын көрсетті. Мемлекеттік рәміздерге деген жауапты көзқарас – саналы қоғам мен кемел мемлекет қалыптастырудың маңызды шарттарының бірі.

Әйтеке би аудандық Қоғамдық кеңес хатшысы, “Әйтеке би ауданының құрметті азаматы” Аманкосова Г.Б.