Аралды құтқару – барша адамзат үшін әлі де өте өзекті міндет

Мемлекет басшысы Қасым-Жомарт Тоқаев Ұлттық құрылтай отырысында Арал теңізі мәселесіне арнайы тоқталып, бұл түйткілдің ел ғана емес, бүкіл адамзат үшін маңызын атап өтті. Президенттің айтуынша, Қызылорда өңіріне келіп тұрып, Арал тағдырына назар аудармай кету мүмкін емес.
– Аралды құтқару – барша адамзат үшін әлі де өте өзекті міндет. Бұл мәселе туралы мен халыққа арнаған Жолдауымда да айттым. Жылдар бойы атқарылған жүйелі жұмыстың арқасында Солтүстік Аралды сақтап қалдық. Қашқан теңіз қайта оралып, Кіші Аралдың қалпына келе бастағанына да біраз жыл болды, – деді Қасым-Жомарт Тоқаев.
Мемлекет басшысының сөзінше, бүгінде Аралды одан әрі қалпына келтіруге бағытталған нақты жобалар қолға алынуда. Соның ішінде Көкарал бөгетін биіктету жұмыстары жоспарланып отыр. Аталған жоба биылғы жылдың соңында басталып, Кіші Аралдағы су көлемін едәуір арттыруға мүмкіндік береді.
Президент бұл бастамалар өңірдің экологиялық жағдайын жақсартып қана қоймай, Арал маңында тұратын халықтың тұрмыс сапасын арттыруға, сондай-ақ табиғи тепе-теңдікті қалпына келтіруге оң ықпал ететінін атап өтті. Аралды сақтау жолындағы жұмыстар мемлекет назарынан тыс қалмайтынын білдірді

Әйтеке би аудандық ақсақалдар кеңесінің төрағасы Б.Исатаев