ЖҰМЫС ІЗДЕП ЖҮРСЕҢІЗ…

Жәрмеңке

Ақтөбеде Қала күніне орай ұйымдастырылған бос жұмыс орындары жәрмеңкесі көпшіліктің қызығушылығын тудырды. «Keruen City» сауда, ойын-сауық орталығында өткен іс-шараға жұмыс іздеушілер көп жиналды.
Жәрмеңкеге жұмыссыздармен қатар, бас бостандығынан айыру орындарынан шыққан, пробация қызметінің есебінде тұрғандар мен алимент бойынша берешегі бар тұрғындар шақырылған. Ұйымдастырушылардың айтуынша, халық көп шоғырланатын орталықта өткізілген іс-шара жұмыс берушілер мен жұмыс іздеушілерді тиімді байланыстыруға мүмкіндік беріп отыр.
Іс-шараға 20-дан астам жетекші кәсіпорын, шағын және орта бизнес өкілдері мен мемлекеттік мекемелер қатысып, барлығы 260-тан астам бос жұмыс орнын ұсынды. Оның қатарында Қазақстан мұнай жабдықтары зауыты, Ақтөбе кенсіз материалдар комбинаты, «Әйгерім» емханасы, «Dina market» ЖШС, «Keruen City» басқарушы компаниясы, «Retro retail» ЖШС, «HR Consulting Kazakhstan» жеке жұмыспен қамту агенттігі және өзге де ұйымдар бар.
Жәрмеңке барысында сатушы-кассир, дәнекерлеуші, токарь, іс жүргізуші, психолог, есепші, механик-жүргізуші, байланыс операторы, сүңгуір, фармацевт, экономист сынды мамандықтар бойынша бос жұмыс орындары ұсынылды.
Ақтөбе қаласы мансап орталығының басшысы Айна Мұрзатаеваның айтуынша, жыл басынан бері үш жәрмеңке ұйымдастырылған.
— Осыған дейінге жәрмеңкелерге барлығы 268 адам қатысып, оның 62-сі тұрақты жұмысқа орналасты. Сонымен қатар мүгедектігі бар 18 тұрғын жұмыспен қамтылды. Қазіргі таңда психолог, дәнекерлеуші және токарь мамандығына сұраныс көп. Маусым айында электромонтерлер мен токарьларға арналған қысқа мерзімді курстар басталады. Курсқа қатысамын деушілер мансап орталығына келіп, жұмыссыз ретінде тіркелуі қажет, — деді ол.
Жәрмеңкеге келушілерге жұмыспен қамтудың белсенді шаралары, мемлекеттің қолдау тетіктері мен қысқа мерзімді кәсіптік оқыту мүмкіндіктері жөнінде ақпарат берілді.
Бос жұмыс орындары туралы ақпаратты еңбек биржасының www.enbek.kz порталынан табуға болады. Дәл қазір Ақтөбе қаласы бойынша кемінде 1 200-ден астам жұмыс орны бос тұр.
Облыстық еңбек мобильділігі орталығының мәліметінше, өңірде бос жұмыс орындары жәрмеңкесі жиі өтіп тұрады. Сәуірдің соңына дейін 43 жәрмеңке ұйымдастырылып, оған 1 145 адам қатысты. Қатысушылар қатарында әйелдер, жастар, мүмкіндігі шектеулі жандар, елу жастан асқан азаматтар және пробация есебінде тұрған ақтөбеліктер бар. Нәтижесінде 403 адам жұмыспен қамтудың белсенді шараларына тартылды. Оның ішінде 140 адам тұрақты жұмысқа орналасса, 137 тұрғын қоғамдық жұмысқа, 40 адам әлеуметтік жұмыс орындарына жіберілді. Сонымен қатар бірнеше жұмыссыз жастар практикасы мен «Күміс жас» жобасы аясында да еңбекпен қамтылған.

Айнұр ІЛИЯСҚЫЗЫ.