Ақтөбеде күреске арналған заманауи спорт кешені ашылды
Ақтөбе қаласында бір мезетте 200 спортшыны қабылдай алатын жаңа күрес спорт кешені пайдалануға берілді. Заманауи талаптарға сай салынған нысан грек-рим, еркін және әйелдер күресімен айналысатын жас спортшылардың шеберлігін шыңдауға арналған.
Жалпы аумағы 2 мың шаршы метрді құрайтын спорт кешенінде жаттығу үдерісін сапалы ұйымдастыруға барлық жағдай жасалған. Кең әрі жарық күрес залдарынан бөлек, спортшылардың жалпы дене дайындығын жетілдіруге арналған арнайы тренажер залы да жабдықталған.
Жас палуандардың денсаулығына ерекше көңіл бөлінген. Кешенде медициналық кабинеттер жұмыс істейді. Бұл спортшылардың денсаулығын тұрақты бақылауға және қажетті медициналық көмек көрсетуге мүмкіндік береді.
Бүгінде Ақтөбе облысында күрес спортын дамыту қарқынды жүргізіліп келеді. Өңірдің барлық ауданында 700-ден астам күрес секциясы жұмыс істейді. Онда 14 мыңнан астам бала грек-рим, еркін және әйелдер күресімен тұрақты түрде айналысады.
