ЖӘРМЕҢКЕ: ТЕХНИКАЛЫҚ МАМАНДАРҒА СҰРАНЫС КӨП

Ақтөбе қаласының Мансап орталығының ұйымдастыруымен «Заң мен тәртіп» қағидасы аясында халықтың әлеуметтік осал санатындағы азаматтарды жұмыспен қамтуға бағытталған бос жұмыс орындар жәрмеңкесі өтті.

Бүгінде өңірде электрондық еңбек биржасының enbek.kz порталында 2 700-ден астам бос жұмыс орны жарияланған. Порталда білім беру және тәрбиелеу, медицина және фармацевтика, көлік және логистика, өндіріс, құрылыс және сәулет, тұрғын үй-коммуналдық шаруашылығы мен абаттандыру және басқа да салалар бойынша жұмыс орындары қолжетімді.
Осыған орай ұйымдастырылған жәрмеңкеге қаладағы бірқатар мекеме мен кәсіпорын қатысып, түрлі бағыттағы бос жұмыс орындарын ұсынды. Жалпы облыста техникалық жұмысшы мамандықтарына сұраныс жоғары. Мәселен, «ЖБИ-25» ЖШС еден жуушы, жол монтері, «КамАЗ», «УАЗ» және автобус жүргізушілері, сондай-ақ дәнекерлеушілерді жұмысқа қабылдауға дайын. Ал «Ассана Дор Строй» ЖШС гудронатор жүргізушісін іздесе, «Ақтан Групп» ЖШС кондитер мамандарын жұмысқа шақырды.
Сонымен қатар жәрмеңкеде сату менеджері, арнайы техника жүргізушісі, В, С және D санатындағы жүргізуші, сатушы-кассир, жанармай құюшы, экспедитор-жүргізуші, электромонтер және өзге де мамандықтар бойынша бос жұмыс орындары ұсынылды.
Іс-шара барысында қатысушыларға мемлекеттік қолдау шаралары таныстырылып, субсидияланатын жұмыс орындары, қысқа мерзімді кәсіптік оқыту бағдарламалары және жұмыспен қамтуға бағытталған мемлекеттік бағдарламалар туралы жан-жақты ақпарат берілді. Мансап орталығының мамандары жұмысқа орналасу жолдары мен мемлекеттік бағдарламаларға қатысу тәртібі бойынша кеңес жүргізді.
Жұмыс іздеушілер бос жұмыс орындары туралы толық ақпаратты enbek.kz порталынан немесе тұрғылықты жері бойынша Мансап орталығына жүгіну арқылы ала алады.

А.АЛТЫБАЕВА.