Еңбек озаттары марапатталды
Металлургтер күні қарсаңында Ақтөбе ферроқорытпа зауытында салтанатты жиын өтіп, сала үздіктері марапатталды. Сондай-ақ өндірістің дамуына үлес қосқан қызметкерлердің есімі Құрмет тақтасына енгізілді.
Мерекелік шарада металлургия саласының ел экономикасындағы маңызы, өндірістегі цифрландыру мен жаңа технологиялардың рөлі ерекше аталды. Дегенмен қандай жаңашылдық енгізілсе де, кәсіпорынның басты байлығы — адам капиталы екені айтылды.
Жиынға қатысқан Ақтөбе қаласының әкімі Азамат Бекет металлургтерді кәсіби мерекемен құттықтап, өндірістің дамуына сүбелі үлес қосып жүрген еңбек адамдарына алғысын білдірді.
— Металлургтер күні — қажымас қайратты, темірдей төзім мен еңбексүйгіштікті талап ететін мамандық иелерінің мерекесі. Металлургия— ел экономикасының ілгерілеуіне, өнеркәсіп қуатының артуына ықпал ететін негізгі саланың бірі. Тарихын 1938 жылғы хром кенін өндіруден бастаған «Қазхром» компаниясы бүгінде еліміздің тау-кен және металлургия саласының көшбасшысы ғана емес, әлемдік деңгейдегі ірі өндірушілердің қатарында тұр. Қазақстанның ғана емес, жаһандық өнеркәсіптің дамуына да елеулі үлес қосып келе жатқан Ақтөбе ферроқорытпа зауыты — инновациялық балқыту технологиясын сәтті меңгеріп, көш бастап тұрған өңір мақтанышы.Осы салада еңбек сіңірген ардагерлерге, қазір металлургия кәсіпорындарында қызмет етіп жүрген барлық маманға алғыс айтамын. Сіздерге зор денсаулық, шаңырақтарыңызға бақ-береке, мол ырыс және еңбекте табыс тілеймін! —деді қала әкімі.
Жиында өндірістегі көп жылғы еңбегі мен кәсіби шеберлігі үшін бірқатар қызметкер қала әкімінің марапатына ие болды. «Ақтөбе қаласының дамуына қосқан үлесі үшін» төсбелгісі Сенімділік, диагностика және инжиниринг бөлімінің бастығы Дмитрий Мочалин мен №2 балқыту цехының ферроқорытпа балқытушысы Серік Туғанбаевқа табысталды.Қала әкімінің Алғыс хатымен салық бөлімінің сарапшысы Дмитрий Тюряев, теміржол цехының жүк түсірушісі Талғат Қазиев және №4 балқыту цехының ферроқорытпа балқытушысы Орынбасар Сүймұханов марапатталды.Металлургия саласының дамуына қосқан үлесі үшін №2 балқыту цехының шебері Аслан Бисенғалиев пен №4 балқыту цехының шебер-технологы Бауыржан Қуатбаев «Еңбек даңқы» III дәрежелі салалық төсбелгісімен наградталды.
Мерекелік жиында «ТҰК «Қазхром» АҚ мен Eurasian Resources Group компаниясының марапаты да табысталды. «ERG еңбек даңқы үшін» төсбелгісі металлургиялық жабдықтарды жөндеу цехының слесарь-жөндеушісі Игорь Мягковқа берілді. Компанияның «Үздік жас маманы» аталымын энергетика цехының жөндеуді ұйымдастыру жөніндегі маманы Асылбек Сарғузин иеленсе, «Үздік өндірістік шебер» аталымы №1 балқыту цехының ауысым шебері Нұрболат Өтегеновке бұйырды. Сондай-ақ бірқатар қызметкер ERG компаниясының Алғыс хатымен, «Қазхром» АҚ-ның «Құрметті қызметкері» атағымен және бас директордың Құрмет грамотасымен марапатталды.
Іс-шараның маңызды сәтінің бірі — кәсіпорынның Құрмет тақтасының ашылуы болды. Құрмет тақтасын зауыт директоры Ержан Абдулабеков пен кәсіподақ комитетінің төрағасы Мырзағұл Құлдыбаев салтанатты түрде ашты.
Биыл өндірістегі жоғары көрсеткіштері мен адал еңбегі үшін 24 қызметкердің есімі Құрмет тақтасына енгізілді. Олардың қатарында №1 балқыту цехының ауысым шебері Қанат Жұмабаев, энергетика цехының сорғы қондырғыларының машинисі Айсұлу Айтжанова, №2 балқыту цехының ферроқорытпа балқытушысы Асанәлі Хамитов, қойма шаруашылығы учаскесінің менеджері Айнұр Нұрқатова, теміржол цехының бағдарлау бекетінің кезекшісі Сәния Мусина және басқа да өндіріс озаттары бар.
Қуанышты сәтте №1 балқыту цехының ауысым шебері Қанат Жұмабаевтыжұбайы мен қызы Інжу қолдап келді.
— Күйеуім осы зауытта 2008 жылдан бері еңбек етеді. Төрт баламыз бар. Інжу —ортаншы қызымыз, биыл бірінші сыныпқа барады. Қанат университетті бітірген соң, 20 жасында осы зауытқа жұмысқа орналасты. Зауытта жұмыс істеу оңай емес, дегенмен еңбегі еленіп жатыр. Биыл алғаш рет Құрмет тақтасына есімі енгізіліп отыр. Бұл — отбасымыз үшін үлкен қуаныш, —дейді жұбайы.
Айнұр ІЛИЯСҚЫЗЫ.
