Құрылтай сайлауына дайындық жұмыстары пысықталды
Әйтеке би ауданында Қазақстан Республикасы Құрылтайы депутаттарын сайлауға дайындық жұмыстары жоспарға сай жүргізілуде. Бүгінде сайлаушыларға шақыру қағаздары толық таратылып, учаскелік сайлау комиссияларының сайлауды ұйымдастырып, талапқа сай өткізуіне қажетті жұмыстар аяқталу кезеңіне жетті.
Сайлау учаскелерінде тиісті үгіттік баспа материалдарын орналастыру үшін орындар белгіленіп, саяси партиялар өздерінің үгіт-насихат плакаттарын ілуде. Қазіргі уақытта сайлауалды үгіт жұмыстары да белгіленген тәртіппен жалғасып жатыр.
Сайлаудың ашық әрі қолжетімді өтуіне де ерекше мән берілуде. Атап айтқанда, сайлау комиссияларына мүгедектігі бар азаматтардың дауыс беруіне қолайлы жағдай жасауға арналған арнайы трафареттер берілді. Сонымен қатар комиссия мүшелеріне қажетті әдістемелік құралдар таратылып, сайлау үдерісін ұйымдастыруға қатысты түсіндіру жұмыстары жүргізілуде.
Жалпы, аудандағы сайлау учаскелерінің материалдық-техникалық және ұйымдастырушылық дайындығы қамтамасыз етіліп, комиссия мүшелері өз міндеттерін атқаруға дайын. Бұл жұмыстардың барлығы азаматтардың конституциялық сайлау құқығын еркін жүзеге асырып, маңызды қоғамдық-саяси науқанның талапқа сай өтуіне бағытталған.
