Спортшының таңдауы

Гір спортынан әлем чемпионатының қола жүлдегері, Азия чемпионатының күміс жүлдегері, спорт шебері Дастан Қойымбетов Мұғалжар ауданындағы №315 сайлау учаскесіне келіп, еліміздің жарқын болашағы үшін дауыс берді.
Халықаралық және республикалық жарыстарда жоғары нәтижеге қол жеткізген спортшы бұл жолы да азаматтық ұстанымын білдірді.
— Спорт маған алдыма мақсат қойып, сол мақсатқа жету үшін аянбай еңбек етуді үйретті. Елдің ертеңіне қатысты маңызды сәттерде әрқайсымыз белсенділік танытуымыз керек. Құрылтай депутаттарының жаңа құрамы игі бастамалардың жалғасуына серпін беріп, еңбек адамының мүддесін қорғауға бағытталған заңнамалық өзгерістерді қолдайтынына сенімдімін. Себебі еңбек адамының әл-ауқаты артқан сайын елдің экономикасы нығайып, қоғамдағы тұрақтылық пен әлеуметтік әділеттілік те беки түседі, — деді ол.
Дастан Қойымбетов 29 жасында салауатты өмір салтын ұстануды мақсат етіп, жүгірумен және гір тасымен жаттыға бастапты. Ол алғашқы жаттығуларын өз ауласында бастаған. Сондай-ақ ол Ембі қаласындағы Жем локомотив депосында машинист көмекшісі болып жұмыс істейді. Қауырт қызметіне қарамастан ол осындай маңызы зор саяси науқандардан тысқары қалмауды азаматтық борышы санайды.