ТМД байқаушылары Құрылтай сайлауын жоғары деңгейде өтті деп бағалады
Тәуелсіз Мемлекеттер Достастығының байқаушылар миссиясы Қазақстандағы Құрылтай депутаттарының сайлауы ұйымдастырушылық тұрғыдан жоғары деңгейде өткенін атап өтті. Бұл туралы миссия басшысы Игорь Петришенко мәлімдеді, деп хабарлайды Ozgeris.info.
Оның айтуынша, сайлау күні миссия өкілдері Қазақстанның 14 өңіріндегі 900-ден астам сайлау учаскесінде болып, дауыс беру барысын бақылады. Сонымен қатар шетелдердегі сайлау учаскелерінің жұмысы да назарға алынған.
Байқаушылардың бағалауынша, барлық учаске белгіленген уақытта ашылып, дауыс беру үдерісі тыныш әрі ұйымдасқан жағдайда өткен. Дауыстарды санау рәсімі қолданыстағы Конституциялық заң талаптарына сәйкес жүргізілген.
Игорь Петришенконың сөзінше, бақылау барысында тіркелген жекелеген ескертулер техникалық сипатта болған және оларды учаскелік комиссиялар жедел түрде түзеткен. Сайлау нәтижелеріне ықпал етуі мүмкін елеулі заңбұзушылықтар анықталмаған.
Миссия қорытындысында 23 тамызда өткен Құрылтай депутаттарының сайлауы Қазақстанның сайлау заңнамасына толық сәйкес ұйымдастырылғаны айтылды. ТМД байқаушылары сайлауды әділ, бәсекелі әрі ашық өтті деп бағалап, азаматтардың өз еркін еркін білдіруіне қажетті жағдай жасалғанын атап өтті.
Миссия басшысы Қазақстан халқын маңызды саяси науқанның аяқталуымен құттықтап, жаңадан сайланған депутаттарға халықтың мүддесін жоғары қойып, елдің дамуына бағытталған заңнамалық шешімдер қабылдауға тілектестік білдірді.
