Жаңарған вокзал жолаушыларға есік ашты

Мемлекет басшысының тапсырмасына сай, біздің облыстың 7 теміржол вокзалында заманауи жаңғырту жұмыстары қолға алынған еді. Бұған дейін Ақтөбе, Шалқар және Шұбарқұдықтағы вокзалдар қайта пайдалануға берілді. Дүйсенбі күні Алғада жаңғыртудан өткен вокзалдың ашылуына орай салтанатты жиын ұйымдастырылды.

Бұл — облысымыздағы заманға сай жөндеу жасалып, толықтай қайта жабдықталған төртінші вокзал.
Оның ашылуына орай өткен жиынға теміржол саласының еңбеккерлері мен ардагерлері, облыс әкімінің орынбасары Асылбек Есенбаев, Алға ауданының әкімі Асланбек Шүйінішәлиев, БАҚ өкілдері және қала тұрғындары қатысты.
Облыс әкімінің орынбасары Асылбек Есенбаев өзінің құттықтау сөзінде:
— Мемлекет басшысы Қасым-Жомарт Тоқаев елімізде 124 вокзалға жаңғырту жұмысын жүргізуге тапсырма берген еді. Бұл — өте ауқымды іс. Жаңғырту жұмысының нәтижесінде вокзал ғимараттары жөндеуден өтіп, заманауи құрал-жабдықтармен қамтамасыз етіліп, жолаушылар үшін барынша қолайлы жағдай жасалады. Бүгін, міне, Алға қаласындағы теміржол вокзалында осыған тағы бір куә болғалы тұрмыз.
Алғалықтар, жалпы, елімізде жол қатынасы инфрақұрылымын жаңғырту жұмыстарының қарқынды жүріп жатқанынан жақсы хабардар. Жақын жылдары пайдалануға берілген Ақтөбе-Қандыағаш автомобиль жолы алғалықтарға, бір жағынан, облыс орталығына алаңсыз барып-келуге мүмкіндік берсе, екінші жағынан, халықаралық жол бойындағы көліктер тасқыны Алғаны айналып өтетін болды, яғни көшелердегі жол қауіпсіздігі мәселесін жақсартты. Қазір Торғай- Ырғыз бағытында жол салу, Ақтөбе-Қарабұтақ-Ұлғайсын жолын жаңғырту жұмыстары жүріп жатыр, — деп атап өтті.
Жиналғандар алдында Марат Жанатұлы «Қазақстан теміржолы» әнін шырқады.
Осы қуанышты оқиғаға орай теміржол саласының ардагері Сәуірбай Үркімбаев та сөз сөйледі:
— Теміржол саласында 42 жыл бойы еңбек еттім. Қазір менің жолымды балам жалғап жүр. Немерем де осы салаға қатысты мамандық таңдап отыр. Сондықтан мен әрдайым теміржол саласының болашағы жарқын болса деп тілеймін. Бұрын вокзалымыз тозығы жеткен, салқын, жолаушыларға қолайсыздау болатын. Бүгінгі келбетін көріп, қуанып тұрмын, — деді ол.
Бұдан соң көпшілік жаңа вокзалдың ішін аралап көрді. Шағын ғана жолаушылар залы жинақы жабдықталып, жаңа орындықтар қойылған. Залдан оң жақта билет кассасы, анықтама бөлімі, одан әрі — вокзал қызметкерлерінің кабинеттері мен полиция торабы орналасқан. Сол жақтағы бөлмелер ана мен балаға және мүгедектігі бар азаматтарға арнап жабдықталыпты. Бәрі де жаңа жиһаз, басқа да қажетті заттармен қамтылған.
Бұрынғы вокзалға келсек, Алға теміржол станциясының тарихы 1912 жылы Орынбор-Ташкент теміржолының бойында негізі қаланған №44 разъезден бастау алады.
1935 жылы Алғада бір қабатты вокзал пайдалануға берілген. Бірақ 90 жылға жуық тарихы бар ғимараттың тозығы жетіп, техникалық, т.б. талаптар тұрғысынан қазіргі заманға сай болмады. Осыған байланысты Алға теміржол вокзалын жаңғырту туралы шешім қабылданған еді. Жобаны іске асыруға «Самұрық-Қазына» қоры қолдау көрсеткен.
Бұрынғы ғимарат сүріліп, орнына жаңа ғимарат салынды. Жаңа ғимараттың жалпы ауданы — 391 шаршы метр. Бұл бұрынғыға қарағанда шағын, алайда бұл жерде күнделікті қызмет көрсетілетін жолаушылар санының есепке алынғанын ескеру керек. Алға Ақтөбе немесе Қандыағаш секілді тоғыз жолдың торабында тұрған жоқ.
— Біздің станса арқылы 7 жолаушылар пойызы өтеді. Күнделікті 50-60 жолаушыға қызмет көрсетіледі. Жаңартылған ғимарат жолаушыларға ұнады деп ойлаймын. Олар да бізбен бірге осы қуанышты бөлісіп отыр, — деді вокзалдың аға кезекшісі Жадыра Селеуова.
Вокзалдарды жаңғырту — еліміздің көлік және жол қатынасы инфрақұрылымын дамыту жолындағы маңызды іс қана емес, сонымен бірге қарапайым еңбек адамдарының ертеңге деген сеніміне игі әсерін тигізетін қадам. Мысалы, осы вокзалда бүгінгі күні 14 адам еңбек етіп жүр.

И.ЖАЙМАҒАМБЕТОВА.