Өмірлік бағдар және өнеге

Ақтөбе құрылыс-техникалық колледжінде облыстық жастар ресурстық орталығының ұйымдастыруымен «Жастарға кеңес» жобасы аясында кездесу өтті. Кездесуде жастардың өмірлік бағыт-бағдары, ұлттық құндылық, білім алу, кітап оқу мен қоғамдық белсенділіктің маңызы талқыланды.

Кездесуде қатысушылар ұлттық құндылық тек тарих пен дәстүрден ғана тұрмайтынын, ол адамның білімге, еңбекке және елге деген қарым-қатынасынан көрінетінін атап өтті. «Ғалым бол» жобасының авторы Жасұлан Қазкелдіұлы жастарға тарихи тұлғалармен қатар, тәуелсіздік жылдарында өз ісімен танылған замандастарымызды да өнеге етуді ұсынды.
— Бүгінгі жастар кейде өмірлік бағдар табуда қиналады. Сондықтан оларға ел дамуына үлес қосқан, өзгелерге қолғабыс еткен замандастарымыз туралы айтқан жөн. Мұндай шынайы оқиғаларды жас ұрпақ жақын қабылдайды, — деді Ж.Қазкелдіұлы.
Жасұлан Қазкелдіұлының «Ғалым бол» ағартушылық жобасы аясында қатысушылар Қаныш Сәтбаев, Өзбекәлі Жәнібеков, Бауыржан Момышұлы сияқты тұлғалар туралы еңбектерді оқыған. Оның жобасының мақсаты — жасөспірімдерді кітап оқуға баулып, оны өмірлік көзқарас қалыптастыру құралына айналдыру.
Кездесуде ақын, танымал әндердің сөзін жазған Оразбек Қиынбаев студенттермен шығармашылық тәжірибе бөлісіп, рухани мұраны сақтаудағы сөз өнерінің рөлі туралы айтты. Студенттер қонақтармен ашық диалог құрып, білім, шығармашылық, рухани даму және мамандық таңдау төңірегінде сұрақ қойды.
Колледждің Жастар комитетінің төрайымы Анар Зайдуллақызының айтуынша, студенттер қоғамдық әрі волонтерлік бастамаларға белсене қатысады. Колледжде құқықбұзушылық пен экстремизмнің алдын алу шаралары, сондай-ақ қыркүйек айынан бастап «Заң және тәртіп» сабағы да тұрақты өткізіледі.

Айнұр ІЛИЯСҚЫЗЫ.