Адал білім — жауапты маман қалыптастырады

«Адал азамат» біртұтас тәрбие бағдарламасын насихаттау мақсатында Ақтөбе автожол колледжінде «Адал студент — жауапты маман» атты дөңгелек үстел өтті. Оған білім алушылар, ұстаздар және құқық қорғау өкілдері, теолог, ата-аналар комитетінің төрағалары қатысты.

Шара барысында жастардың қоғам алдындағы жауапкершілігі, құқықтық мәдениеті, кәсіби бағыт-бағдары, еңбекке деген көзқарасы, адамгершілік құндылықтары және болашақ маман ретінде қалыптасуы жөнінде өзекті мәселелер талқыланды. Дөңгелек үстелге қатысқан «Алтын алқа» иегері, кәсіби медиатор, заңгер Бибігүл Әбдішүкірқызы отбасылық құндылықтар туралы әңгіме өрбітсе, қалалық полиция басқармасы бастығының орынбасары, полиция подполковнигі Мирхан Есенжолов құқықбұзушылықтың алдын алу мақсатында атқарылып жатқан жұмыстарға тоқталды.
Ұйымдастырушылар білім алушылар арасында адалдық, жауапкершілік, еңбекқорлық, құқықтық сауаттылық және кәсіби мәдениет құндылықтарын қалыптастыру, студенттік кезеңнен бастап өз ісіне жауапкершілікпен қараудың маңызын түсіндіру бағытындағы шаралардың жалғасатынын жеткізді.
Ашық форматтағы пікір алмасу барысында білім алушылар өздерін толғандырған сауалдарын қойып, мамандардан нақты жауап алуға мүмкіндік алды. Әсіресе құқықбұзушылықтың алдын алу, жастардың бос уақытын тиімді ұйымдастыру, кәсіби даму, еңбекке адал көзқарас және қоғам алдындағы азаматтық жауапкершілік мәселелеріне ерекше назар аударылды. Адалдық пен жауапкершілік — сапалы маман қалыптастырудың және жарқын болашаққа бастар жолдың берік негізі.

Өз тілшіміз.