«Атамекен» палатасы Әйтеке би ауданындағы кәсіпкерлердің жер және құқықтық мәселелерін шешуге көмектесті

Кәсіпкерлердің өтініштері бойынша үш бизнес-жобаға қажетті қолдау көрсетілді: «Дальнобойщик» кемпингінің жер мәселесі бойынша оң шешім қабылданды, «Әділ» кемпингінің ғиматын заң талаптарына сәйкестендіру мәселесі шешілді, ал «Жаннұр» шаруа қожалығындағы техникалық және құжат рәсімдеуге қатысты кедергілер реттелді.

Әйтеке би аудандық Кәсіпкерлер палатасының филиалында Берік Аяповтың төрағалығымен Кәсіпкерлер кеңесінің кезекті отырысы өтті. Жиынның негізгі тақырыбы – Ақтөбе облысы Кәсіпкерлер палатасының директоры Дидар Боранқұловтың биылғы маусым айында ауданға жасаған жұмыс сапары барысында көтерілген жергілікті кәсіпкерлердің өтініштерін қарау нәтижелері.

Кәсіпкерлер палатасына түскен бірқатар өтініш бойынша нақты нәтижелерге қол жеткізілді.

Атап айтқанда, Қарабұтақ ауылындағы «Дальнобойщик» кемпингінің иесі, жеке кәсіпкер «Тян Ли» нысан аумағын кеңейту үшін қосымша жер учаскесін бөлуге жәрдемдесуді сұраған. Кәсіпкерге автотұрақты кеңейтіп, кемпинг жанынан шаруашылық нысандарын салу үшін жер қажет болды. Кемпинг «Самара – Шымкент» автожолының бойында орналасқан.

«Атамекен» палатасы кәсіпкерге кешенді сүйемелдеу көрсетіп, уәкілетті органдармен өзара іс-қимыл жасауына көмектесті. Нәтижесінде аудандық жер қатынастары жөніндегі комиссия кәсіпкердің бастамасын қолдады. Бұл кемпингті кеңейту жоспарын жүзеге асыруға мүмкіндік беретін маңызды қадам болды.

«Әділ» кемпингінің иесі «Берік АБ» ЖШС-нің өтініші де оң шешімін тапты. Нысанның қызметін одан әрі дамыту үшін компанияға салынған ғимаратты заңнама талаптарына сәйкестендіру қажет болған. Палатаның құқықтық қолдауымен мәселе мемлекеттік органдармен бірлесіп қаралды. Нәтижесінде ғимаратты рәсімдеуге байланысты мәселені реттеу бойынша оң шешім қабылданды.

Сондай-ақ мал бордақылау алаңын салу жобасын жүзеге асырып жатқан «Жаннұр» шаруа қожалығына да нақты көмек көрсетілді. Кәсіпкерлер палатасының аудандық филиалының сүйемелдеуімен техникалық мәселелер реттеліп, құжаттарды рәсімдеуге байланысты кедергілер жойылды. Бұл жобаны келесі кезеңге жылжытуға мүмкіндік берді.

Үш жағдайда да Кәсіпкерлер палатасы бизнес пен мемлекеттік органдар арасындағы байланысты қамтамасыз етіп, құқықтық, консультациялық және ұйымдастырушылық қолдау көрсетті.

Отырыс барысында кәсіпкерлерге «Атамекен» ҰКП әзірлеген BusinessGO цифрлық платформасы да таныстырылды. Бұл сервис сауда мен есептілікті автоматтандыруға, күнделікті бизнес-процестерді жеңілдетуге мүмкіндік береді.

Аудан кәсіпкерлері платформаның мүмкіндіктерін толық пайдалана алуы үшін ақпараттық-түсіндіру жұмыстарын күшейту туралы шешім қабылданды. Оның ішінде кәсіпкерлік нысандарын тікелей аралап, «есіктен есікке» қағидаты бойынша түсіндіру жұмыстарын жүргізу жоспарланып отыр. Сонымен қатар кәсіпкерлерге платформаның жұмысын таныстыру, оқыту және жүйеге қосылуға көмектесу мақсатында дөңгелек үстел өткізу көзделген. Толық ақпаратты businessgo.kz сайтынан алуға болады.

Жиында бұдан бөлек, қосымша қарауды қажет ететін мәселелер де көтерілді. Жеке кәсіпкер А. Боранбаев аудан кәсіпкерлерінің атынан газ тарифтерінің өсуіне қатысты мәселені ортаға салды. Сонымен қатар қатысушыларға ҚР Ұлттық экономика министрлігі Табиғи монополияларды реттеу комитетінің Ақтөбе облысы бойынша департаментінде өткен жария тыңдаулардың қорытындылары таныстырылды.

Талқылау қорытындысы бойынша Кәсіпкерлер кеңесінің мүшелері екі мәселені облыстық салалық кеңестердің қарауына бірауыздан ұсыну туралы шешім қабылдады. Олар – газ бен электр энергиясы тарифтерін қайта қарау, сондай-ақ шетелдік жұмыс күшін тарту қағидаларына өзгерістер мен толықтырулар енгізу.

Жүйелі шешімді талап ететін бұл мәселелер облыстық деңгейде әрі қарай пысықталатын болады.