ПРОКУРОР ОҚУШЫЛАРМЕН КЕЗДЕСТІ

М.Мақатаев атындағы №73 мектепте «Заң және тәртіп» қағидаты аясында «Прокурор сағаты» жобасы бойынша кездесу өтті.

Кездесуде Ақтөбе қаласы прокуратурасының бөлім прокуроры Батырхан Жанабаев оқушыларға заң талаптары мен құқықтық жауапкершілік туралы әңгімеледі.
Оқушылардың құқықтық сауатын арттырып, құқықбұзушылықтың алдын алу мақсатында өткізілген кездесу барысында жасөспірімдердің құқықтары мен міндеттері, заңға бағынудың маңызы сөз болды.
Іс-шарада 8-10-сынып оқушыларының «Заң және тәртіп» тақырыбындағы суреттер көрмесі таныстырылды. Ашық диалог кезінде оқушылар өздерін толғандырған сұрақтарын қойып, прокурордан жауап алды. Сондай-ақ бейнематериалдар көрсетіліп, құқықбұзушылықтың алдын алу жолдары түсіндірілді.
Кездесу соңында мектеп директорының тәрбие ісі жөніндегі орынбасары Гүлназ Ахметова «Заң және тәртіп» қағидаты аясында білім ордасында атқарылып жатқан жұмыстарды таныстырды.
Мұндай кездесулер оқушылардың заңды білуіне, өз құқығын қорғап, өзгенің құқығын құрметтеуіне ықпал етеді.

Айнұр ІЛИЯСҚЫЗЫ.