Заңға құрмет — қауіпсіз қоғам негізі

Ақтөбе қаласындағы №8 орта мектепте «Заң және тәртіп» қағидатын насихаттауға бағытталған «Жасөспірім және заң» облыстық профилактикалық онкүндігі аясында іс-шара өтті. Жиын «Заң және тәртіп — қоғам негізі» тақырыбына арналды.

Шара аясында ата-аналармен «Заң бар жерде — қауіпсіздік бар» тақырыбында ашық диалог ұйымдастырылды.
Кездесудің негізгі мақсаты — жасөспірімдер арасындағы құқықбұзушылықтың алдын алу, ата-аналардың құқықтық сауатын арттыру, бала қауіпсіздігін қамтамасыз етудегі отбасы мен мектептің ортақ жауапкершілігін нығайту, сондай-ақ өскелең ұрпақтың бойында құқықтық мәдениет пен заңға құрмет қалыптастыру.
Жиынға ата-аналар, қалалық білім бөлімінің өкілдері, құқық қорғау органдарының қызметкерлері және жастар ресурстық орталығының басшысы қатысты.
Кездесуді мектеп директоры Талғат Қаймолдин ашып, бала тәрбиесі мен қауіпсіздігін қамтамасыз етуде ата-аналар мен мектеп арасындағы өзара ынтымақтастықтың маңызын атап өтті. Қалалық білім бөлімінің әдіскері Данияр Қуанышбаев «Заң бар жерде — қауіпсіздік бар» тақырыбында баяндама жасап, бала қауіпсіздігін қамтамасыз етуде білім беру ұйымдары мен ата-аналардың бірлескен жұмысы маңызды рөл атқаратынын айтты.
Алматы ауданы №2 ҚПБ бастығы, полиция подполковнигі Ілияс Амангелді «Кәмелетке толмағандардың құқықтық жауапкершілігі және құқықбұзушылықтың алдын алу» тақырыбында түсіндіру жұмысын жүргізді. Ол жасөспірімдердің заң алдындағы жауапкершілігі, құқықбұзушылыққа әкелетін әрекеттер және оның алдын алу жолдары туралы баяндады.
Мектеп психологы Самал Дощимова балалардың психологиялық жағдайына назар аудару, эмоционалды қысымның белгілерін дер кезінде байқау және оларға қолдау көрсетудің маңызын түсіндірді. Қалалық жастар ресурстық орталығының басшысы Ержан Қанатұлы цифрлық кеңістіктегі қауіп-қатер, әлеуметтік желіні дұрыс пайдалану және балалардың интернеттегі қауіпсіздігін бақылау мәселесін көтерді. Сондай-ақ директордың тәрбие ісі жөніндегі орынбасарлары Талғат Нұрғалиев пен Айнұр Хамадинова жасөспірімдер арасындағы құқықбұзушылықтың негізгі себептеріне, отбасындағы тәрбиенің рөліне, ата-ана бақылауы мен балаға көрсетілетін тәрбиелік қолдаудың маңызына тоқталды.
Ата-аналармен кездесуден кейін білім алушылардың жас ерекшеліктерін ескере отырып, тәрбие сағаты ұйымдастырылды. Атап айтқанда, 1-4 сынып оқушылары «Мен — жауапты оқушымын», ал 5-9 сынып оқушылары «Менің құқығым, менің жауапкершілігім» тақырыбында тәрбие сағаттарына қатысты. Бұл сабақтар оқушылардың құқықтық сауатын арттыруға, өз құқықтары мен міндеттерін білуге, жауапкершілік пен тәртіп мәдениетін қалыптастыруға бағытталды.
Ашық диалог барысында ата-аналар өздерін толғандырған сұрақтарын қойып, мамандардан жауап алды.

Гүлжан БАЗЫЛҚЫЗЫ