Олжас Бектенов Дөң тау-кен байыту комбинатының «Болашақ» шахтасындағы өнеркәсіптік қауіпсіздік шараларын тексерді

Премьер-министр Олжас Бектенов Ақтөбе облысының Хромтау ауданындағы «Қазхром» трансұлттық компаниясы» АҚ-ның Дөң тау-кен байыту комбинатына қарасты «Болашақ» шахтасына барып, өнеркәсіптік қауіпсіздік пен еңбекті қорғауды қамтамасыз ету бойынша қабылданып жатқан шараларды тексерді. Өндірістік тәуекелдердің алдын алудың заманауи технологияларын және цифрлық бақылау жүйелерін енгізуге назар аударылды.

Жоба отандық тау-кен металлургия саласындағы ең ірі жобалардың бірі болып саналады. Шахта 2024 жылдың желтоқсанында Президент Қасым-Жомарт Тоқаевтың қатысуымен іске қосылды.

Шахта Миллионное және Алмаз-Жемчужина кен орындарын және алты жерасты горизонтын қамтиды. Оның аумағында ұзындығы бір шақырымнан асатын Қазақстандағы ең терең шахта оқпаны орналасқан. Өндіріс жылына 7 млн тоннадан астам кен өндіруге қауқарлы. Жобаны жүзеге асыруға салынған инвестициялар шамамен 1 трлн теңгеге бағаланады. 1,8 мың жұмыс орны ашылды.

«Қазхром» трансұлттық компаниясы» АҚ бас директоры Ержан Абдулабеков қолданыстағы кен өндіру технологиялары мен өнеркәсіптік қауіпсіздікті қамтамасыз ету шаралары туралы баяндады. Мемлекет басшысы жариялаған Цифрландыру және жасанды интеллект жылы аясында өндірістің тиімділігін арттыруға бағытталған цифрлық шешімдер енгізілуде. Шахтада қол еңбегінің үлесін азайтуға және еңбек өнімділігін арттыруға мүмкіндік беретін заманауи, жоғары өнімді кен өндіру жүйелері мен өздігінен жүретін арнайы техника қолданылады. Персонал мен жабдықтың орналасқан жерін бақылау үшін интеллектуалды жерасты позициялау жүйесі қолданылады. Технологиялық шешімдерді әзірлеу үшін Қазақстан мен шет елдердің салалық ғылыми ұйымдары тартылып, шахта кеңістігіндегі қауіпті газдарды алдын ала шығару  жобасы әзірленді. Өнеркәсіптік қауіпсіздік жүйесін жетілдіру жөніндегі жұмыс ғылыми зерттеулерді, цифрлық модельдеуді және заманауи инженерлік шешімдерді енгізуді қамтиды.

Шахтаны аралау барысында Премьер-министр өнеркәсіптік қауіпсіздік және еңбекті қорғау мәселелеріне назар аударды. Бұрын анықталған бұзушылықтар мен апаттарды ескере отырып, Олжас Бектенов өндірістік нысандарда белгіленген талаптардың сақталуын бақылауды күшейтуді, жабдықтың тиісті техникалық жай-күйін қамтамасыз етуді және жазатайым оқиғалардың алдын алу бойынша қосымша шаралар қабылдауды тапсырды. Қауіпсіз еңбек жағдайларын жасау және қызметкерлердің өмірі мен денсаулығы үшін тәуекелдерді азайту бойынша кәсіпорын басшыларының дербес жауапкершілігі атап өтілді.

«Мемлекет басшысы қоғамдық және экономикалық өмірдің барлық саласында “Заң мен Тәртіп” конституциялық қағидатын нығайту саясатын жүйелі түрде жүзеге асырып келеді. Өнеркәсіп саласында бұл, ең алдымен, – қауіпсіздік талаптарын мүлтіксіз сақтау және қызметкерлердің өмірі мен денсаулығы үшін кәсіпорын басшыларының жауапкершілігі. Оқиғалар орын алғаннан кейін әрекет етуден бұрын тәуекелдердің алдын алудың жүйелі тәсіліне көшіп, бақылаудың цифрлық құралдарын белсенді түрде енгізу қажет. Еңбек қауіпсіздігі әрбір кәсіпорынның өндірістік мәдениетінің ажырамас бөлігіне айналуға тиіс», — деп атап өтті Олжас Бектенов.

Жалпы Қазақстанда Төтенше жағдайлар министрлігі өнеркәсіптік қауіпсіздікті бақылауды цифрландыру бойынша дәйекті жұмыс жүргізуде. Ведомствоның Ахуалдық орталығына тәулік бойы «Karaganda Komir» ЖШС, «Қазақмыс корпорациясы»  ЖШС, «Шалқия Цинк LTD» АҚ және «Қазхром» ТҰК» АҚ Дөң тау-кен байыту комбинаты филиалының 20 шахтасы мен кенішінен позициялау және бейнемониторинг жүйелерінің деректері келіп түседі. Бұл нақты уақыт режимінде жұмысшылар мен техникалардың орналасқан жерін бақылауға, кеніш ауасының жай-күйін бақылауға, қауіпті факторларды анықтауға және жедел хабарлау сигналдарын іске қосуға мүмкіндік береді.