Ержан Абдулабеков: өндірістен – өңірлерді дамытуға

Мәслихат депутаттарының кезектен тыс сайлауы қарсаңында Хромтау және Әйтеке би аудандары бойынша Ақтөбе облыстық мәслихаты депутаттығына кандидат Ержан Абдулабековпен сұхбаттастық. Ірі өнеркәсіптік компанияның басшысы неліктен депутаттыққа кандидат болуға шешім қабылдады және тұрғындарды толғандыратын қандай мәселелерді маңызды деп санайды? Бұл туралы – біздің материалда.
Ержан Абдулабеков еңбек жолын 2001 жылы Ақтөбе ферроқорытпа зауытының (АФЗ) бірінші цехында балқытушы болып бастады. Осы жылдар ішінде ол Ғылыми-инженерлік орталықта еңбек етіп, төртінші балқыту цехын іске қосу және дамыту жұмыстарына қатысты, бас технолог және бас металлург қызметтерін атқарды. 2021 жылы АФЗ директорының өндіріс жөніндегі орынбасары, ал 2023 жылғы қаңтарда зауыт директоры болды. 2026 жылғы 1 қыркүйектен бастап «Қазхром» ТҰК» АҚ бас директоры қызметін атқарады. Екі жоғары білімі бар және техника ғылымдарының кандидаты дәрежесіне ие. Отбасылы, үш баланың әкесі.
– Ержан Эдгарович, сіз балқытушыдан «Қазхромның» бас директорына дейінгі жолдан өттіңіз. Осы еңбек жолында сіз үшін ең маңыздысы не болды?
– Мен еңбек жолымды жұмысшы мамандығынан бастадым, сондықтан өндірістің қыр-сырын жақсы білемін. Цехта еңбек еттім, технологиялық бағытта жұмыс істедім, ірі жобаларға қатыстым, ұжым басқардым. Әр кезеңде жаңа нәрсе үйренуге, шешім қабылдауға және нәтижеге жауап беруге тура келді. Осы жол ең маңызды нәрсені, яғни адамдарсыз ешбір істің алға баспайтынын үйретті. Әрбір нәтиженің негізінде олардың еңбегі, кәсібилігі мен жауапкершілігі жатыр. Бүгінде үлкен компанияны басқара отырып, адамдарға жақсы жұмыс істеуге ғана емес, лайықты өмір сүруге де жағдай жасау қаншалықты маңызды екенін терең түсінемін.
– Неліктен Хромтау және Әйтеке би аудандары бойынша кандидат болуға шешім қабылдадыңыз?
– Хромтау «Қазхромның» тарихы және дамуымен тығыз байланысты. Мұнда компанияның негізгі кәсіпорындарының бірі – Дөң тау-кен байыту комбинаты орналасқан. Осында менің әріптестерім, олардың отбасылары мен балалары тұрады. Комбинаттың қала тұрғындары мен өңір экономикасы үшін қандай маңызға ие екенін жақсы түсінемін. Кәсіпорынның дамуы Хромтаудың дамуымен, адамдардың өмір сүруіне қолайлы жағдай жасаумен қатар жүруі керек.
Әйтеке би ауданы – өңіріміздің басты астықты аймағы. Өзім де жеке сектордың тұрмысын жақсы білемін. Сондықтан тұрғындардың күнделікті өмірде қандай мәселелерге тап болатыны маған таныс. Жолдардың жағдайы, көшелерді жарықтандыру, сумен қамту, абаттандыру, қоқыс шығару – мұның бәрі адамдар үшін маңызды. Өйткені жайлы өмір осындай күнделікті мәселелердің шешілуінен басталады.
Ірі ұжымдарды басқарған жылдары өндірістік міндеттермен қатар әлеуметтік мәселелермен де айналысуға тура келді. Қызметкерлердің тұрғын үй мәселесін шешуге көмектестік, абаттандыру жұмыстарын жүргіздік, балалардың дамуына жағдай жасадық, ерекше қолдауды қажет ететін адамдарға көмек көрсеттік. Осындай жұмыстың адам өміріне қаншалықты әсер ететінін көрдім. Енді осы бағыттағы жұмысты бір кәсіпорынның аясымен шектемей, екі аудан деңгейінде жалғастыруға ниетім де, күшім де, тәжірибем де бар. Басқару саласында жинаған тәжірибем депутаттық қызметте де пайдасын тигізеді деп сенемін.
– Депутат болған жағдайда тұрғындардың өтініштерімен жұмысты қалай ұйымдастыруды жоспарлап отырсыз?
– Ең алдымен, аудандарға тұрақты түрде барып, тұрғындармен кездесіп отыруды жоспарлап отырмын. Тұрғындардың өтініштеріне әрдайым ашық болып, олармен тұрақты байланыста боламын. Оларда менің байланыс нөмірлерім болады. Кез келген адам өз мәселесін айтып, сұрағын қойып немесе ұсынысын жеткізе алады.
Әрбір өтінішті тек тыңдап қана қоймай, мәселенің мән-жайын анықтап, оны шешуге кім жауапты екенін белгілеу және тиісті органдарға жүгіну маңызды. Өтініштердің қаралу барысын бақылап, нақты жауап беріліп, қажетті шаралардың қабылдануын қадағалаймын.
– Хромтау және Әйтеке би аудандарының тұрғындары үшін қандай мәселелерді бірінші кезекте шешу қажет деп санайсыз?
– Бірнеше мәселені атап өтер едім. Хромтау ауданында өнеркәсіптің дамуы қала мен ауылдардың инфрақұрылымын жаңартумен қатар жүруі маңызды. Бұл – жолдар, коммуналдық желілер, аулалар мен әлеуметтік нысандар. Мысалы, Бөгетсай ауылының тұрғындарымен кездесуде жергілікті мектептің жағдайы жеке талқыланды. Тұрғындар ғимаратқа күрделі жөндеу жүргізу, оқу кабинеттерін жаңарту, заманауи экрандар мен жабдықтар орнату қажеттігін айтты. Мектепте күрделі жөндеу жұмыстарын жүргізу «Әділет» партиясының бағдарламасында қарастырылған. Енді бұл мәселені жүйелі түрде қолға алып, жүзеге асыру маңызды.
Әйтеке би ауданында ауылдар арасындағы жолдардың жағдайы мен елді мекендерді газдандыру мәселесі өзекті. Қоқысты шығару және қайта өңдеу мәселесі де ерекше назарды қажет етеді. Сонымен бірге ауданның даму мүмкіндігі мол. Фермерлік шаруашылықтарды дамытуға, жергілікті өнімді қайта өңдеуге, инвестиция тартуға және жаңа жұмыс орындарын ашуға жағдай жасау қажет. Мұның бәрі ауыл тұрғындарының табысына және ауданның келешегіне тікелей әсер етеді.
Екі аудан үшін де медициналық көмектің қолжетімділігі, тұрғын үй және жастарға жұмыс орындарын ашу мәселелері өзекті. Жастар мамандық игеріп, жұмыс тауып, өз болашағын туған өңірінде құра алатындай мүмкіндік болуы керек.
Депутат ретінде осы мәселелерді облыс деңгейінде көтеріп, тиісті органдарға жүгінемін және олардың шешілу барысын қадағалаймын.