Жаңа даму бағдары

С.Бәйішев атындағы Ақтөбе университетінде Мемлекет басшысы Қасым-Жомарт Тоқаевтың Қазақстан халқына арнаған биылғы Жолдауындағы басым бағыттарды түсіндірген жиын өтті. Оған оқытушылар, болашақ заңгерлер, басқа да студенттер қатысты.

Жиында құжатта белгіленген негізгі міндеттер мен ел дамуының басым бағыттары талқыланды. Кездесуді университеттің әлеуметтік-мәдени даму жөніндегі проректоры Шыныбек Бұхарбаев ашып, Президент Жолдауы елдің алдағы даму бағдарын айқындайтын маңызды құжат екенін атап өтті. Сондай-ақ оның негізгі басымдықтарын терең түсініп, қоғам арасында кеңінен насихаттаудың маңызына тоқталды.
С.Бәйішев атындағы университеттің құқықтану кафедрасының профессоры, заң ғылымдарының кандидаты Бақытбек Телібеков Жолдауда адам мүддесіне басымдық берілгенін атап өтті. Оның пікірінше, елдің дамуы халықтың әл-ауқатын жақсартумен және күнделікті мәселелерін шешумен тығыз байланысты.
Сондай-ақ ол құрылыс, ауыл шаруашылығы, көлік және логистика салаларын дамыту, инвестиция тарту, әлеуметтік және спорт нысандарын салу маңызды міндеттер қатарында екенін айтты.
— Заңгер ретінде цифрландырудың маңызына ерекше тоқталғым келеді. Заманауи технологиялар мен цифрлық платформалар мемлекеттік қызметті қолжетімді әрі ашық етуге, бюрократиялық кедергілерді азайтып, сыбайлас жемқорлық тәуекелін азайтуға мүмкіндік береді. Бұл мүмкіндіктерді ауыл тұрғындары да пайдалана алуы керек, — деді Бақытбек Телібеков.
Университеттің жаратылыстану-гуманитарлық ғылымдар жоғары мектебінің қауымдастырылған профессоры Ирина Телібекова да Жолдаудағы басым бағыттарға тоқталды. Ол Қазақстанның тәуелсіздігін нығайту, экономиканы дамыту және мемлекеттік басқару тиімділігін арттыру мәселелерінің маңызын атап өтті. Сонымен қатар көлік логистикасын, білім беру мен денсаулық сақтау салаларын жетілдіру қажетін айтты. Ирина Телібекова заңнаманы жаңарту мәселесіне де назар аударды. Оның айтуынша, цифрлық технологиялардың дамуы мен жаңа экономикалық қатынастар Азаматтық кодексті заман талабына сай жетілдіруді қажет етеді.
Кездесу барысында болашақ заңгерлердің елдің құқықтық жүйесін дамытуға қосар үлесі де талқыланды. Студенттерге заңнаманы жетік меңгеріп, ондағы өзгерістен хабардар болудың және жаңа талапқа бейімделудің маңызы түсіндірілді. Жиын соңында Президент Жолдауында белгіленген міндеттерді жүзеге асыру мемлекет, білім беру ұйымдары мен қоғамның бірлескен жұмысын қажет ететіні айтылды.
Мұндай кездесулер жастардың ел дамуындағы басым бағыттарды түсінуіне, құқықтық сауатын арттырып, болашақ мамандығына жауапкершілікпен қарауына жол ашады.

Айнұр ІЛИЯСҚЫЗЫ.