«Ұлттың бәсекеге қабілеттілігі ең алдымен оның білім деңгейімен өлшенеді». Бүгінде бұл қағида бұрынғыдан да маңызды. Жоғары оқу орнын тәмамдаған жастардың саны артқанымен, олардың алғашқы жұмысқа орналасуы әлі де өзекті мәселе. Көптеген жас мамандар еңбек өтілінің жоқтығынан жұмыс табуда қиындық көреді. Сондықтан, жастардың алғашқы кәсіби қадамын қолдау – елдің адами капиталын дамытудағы маңызды бағыттардың бірі. Осы мақсатта елімізде жүзеге асырылып жатқан нәтижелі бастамалардың бірі – GPA көрсеткіші арқылы мемлекеттік қызметке қабылдау жүйесі. GPA – студенттің оқу кезеңіндегі академиялық үлгерімінің орташа көрсеткіші. Әлемдік тәжірибеде ол білім сапасын бағалаудың маңызды өлшемі саналады. Қазақстанда да бұл көрсеткіш білімді жастарды мемлекеттік қызметке тартудың тиімді тетігіне айналып келеді. Бағдарламаға сәйкес, GPA көрсеткіші 3,33-тен төмен емес жоғары оқу орнының түлектері диплом алған күннен бастап, бір жыл ішінде конкурссыз ауылдық және аудандық деңгейдегі мемлекеттік органдарға жұмысқа орналаса алады. Бұл – жас маманның еңбек жолын сенімді бастауына берілген нақты мүмкіндік. Себебі, үлкен жетістіктің бастауы – алғашқы қадам. Жоба – 2023 жылдан бері жүзеге асырылып келеді. Биыл оған маңызды өзгеріс енгізілді. Бұрын бағдарлама тек мемлекеттік грант негізінде білім алған түлектерге арналса, енді талапқа сай GPA көрсеткішіне ие ақылы негізінде білім алған түлектерде қатыса алады. Бұл – жастарға тең мүмкіндік беріп, білімді нақты нәтижемен бағалаудың айқын көрінісі. Бағдарлама жас мамандардың жаңа ортаға бейімделуіне де жағдай жасайды. Қызметке қабылданғаннан кейін әрбір жас қызметкерге тәжірибелі тәлімгер бекітіледі. Ол жұмыс тәртібін түсіндіріп, кәсіби бағыт-бағдар береді. Мұндай қолдау жас маманның өз ісіне сенімді болып қалыптасуына ықпал етеді. Сонымен қатар, мемлекеттік қызметтің халық алдындағы жауапкершілігі мен адал қызмет ету қағидаларын терең түсінуге мүмкіндік береді. Мен де, осы бағдарлама аясында Әл-Фараби атындағы Қазақ ұлттық университетінің журналистика факультетін 3,81 GPA көрсеткішімен тәмамдап, Қазақстан Республикасы Мемлекеттік қызмет істері агенттігінің Ақтөбе облысы бойынша департаментінің келісімімен туған өлкем – Әйтеке би аудандық ішкі саясат бөліміне бас маман ретінде қабылдандым. Өз тәжірибеме сүйене отырып, бұл бастама жастардың білімін ел игілігіне жұмсауына кең мүмкіндік береді деп сеніммен айта аламын. Сондықтан, білімді жастарды туған елдің дамуына үлес қосып, мемлекеттік қызмет арқылы халыққа адал еңбек етуге шақырамын. Өйткені, жастарға берілген әрбір мүмкіндік – Қазақстанның болашағына салынған маңызды инвестиция. Әйтеке би аудандық ішкі саясат бөлімінің бас маманы А. Муттахайқызы
