«Отбасында зорлық-зомбылықсыз Қазақстан» республикалық акциясы өткізілуде
2026 жылдың 18 мамыр – 8 маусым аралығында аудан аумағында республикалық «Отбасында зорлық-зомбылықсыз Қазақстан» акциясы өткізілуде. Аталған іс-шараның негізгі мақсаты – тұрмыстық зорлық-зомбылықтың алдын алу, отбасы құндылықтарын насихаттау, құқық бұзушылықтардың жолын кесу және қоғамда құқықтық мәдениетті қалыптастыру.
Акция барысында аудандық полиция бөлімі мен мүдделі мемлекеттік органдар бірлесіп профилактикалық жұмыстар жүргізуде. Атап айтқанда, тұрғындар арасында түсіндіру жұмыстары ұйымдастырылып, құқықтық кеңестер берілуде. Сонымен қатар, тұрмыстық зорлық-зомбылыққа бейім азаматтармен жеке профилактикалық әңгімелер өткізілуде.
Іс-шара аясында білім беру ұйымдарында, мемлекеттік мекемелерде және халық көп жиналатын орындарда кездесулер ұйымдастырылып, жадынамалар мен ақпараттық парақшалар таратылуда. Мамандар отбасындағы сыйластық пен өзара түсіністіктің маңыздылығын түсіндіріп, зорлық-зомбылықтың қоғамға тигізер кері әсерін атап өтуде.
Отбасы – қоғамның негізгі тірегі. Сондықтан әрбір азамат отбасы тыныштығы мен қауіпсіздігін сақтауға жауапкершілікпен қарауы тиіс. Кез келген зорлық-зомбылық әрекеті заң аясында жауапкершілікке әкелетінін еске саламыз.
Аудан тұрғындарын құқық бұзушылықтарға бейжай қарамауға, отбасы құндылықтарын құрметтеуге және қоғамдағы тыныштық пен қауіпсіздікті сақтауға шақырамыз. Бақытты елді бірге құрайық!
