Депутат мінбері. Іргелі округтегі ілкімді істер
«AMANAT» партиясы саяси бюросының №011 pq қаулысы бойынша партия төрағасы Е.Қошанов депутаттық корпустағы елеулі қызметі және партиялық міндеттерді жүзеге асырудағы жүйелі жұмыстарын бағалап, Еренов Асан Тәженұлын «Белсенді қызмет үшін»төсбелгісімен марапаттады.Оны партияның облыстық филиалы төрағасының бірінші орынбасары Е.Данағұлов табыстады.
Ауыл – елдің берекесі, ырыс пен ынтымақтың ордасы. Соңғы жылдары мемлекет тарапынан ауылдық жерлердің әлеуетін арттыруға бағытталған нақты істер қолға алынып, тұрғындардың тұрмыс сапасын жақсартуға ерекше көңіл бөлініп келеді. Бұл игі бастамалардың игілігін біздің округтің тұрғындары да сезінуде.
Қазіргі таңда округ орталығында жол құрылысы басталды. Бұл – тұрғындардың көптен күткен қуанышы. Алдағы кезде тозығы жеткен топырақ жолдар жаңарып, ауыл көшелері көркейе түсер деген үміт бар. Жабасақ ауылдық округі тұрғындарына қуаныш сыйлаған жаңалықтың бірі- көгілдір отын тарту жобасы жүзеге асырылмақ. Бұл – тұрғындардың өмір сапасын айтарлықтай жақсартып, тұрмыс жағдайын жеңілдететін маңызды қадам болмақ.
Мемлекет басшысы Қасым-Жомарт Тоқаев биылғы 8 қыркүйектегі Жолдауында:
«Ауылдың дамуы – елдің дамуының кепілі. Халықтың өмір сүру сапасын жақсарту әрбір өңірдегі нақты жобалар арқылы көрінуі керек. Инфрақұрылым мен тұрмыс сапасын арттыру – басты міндет», – деген болатын.
Бұл сөздер ауылда еңбек етіп, ел игілігі үшін жұмыс істеп жүрген әрбір азаматқа зор жауапкершілік жүктейді.
Округімізде екі елді мекен бар. Екеуі де іргелі, ынтымағы жарасқан, елге еңбек сіңіріп жүрген жандар көп. Тұрғындар жаңа жобаларды қуана қабылдап, ауылдың көркеюіне өз үлестерін қосуда. Жол мен газ мәселесі шешілсе, кәсіпкерлік те, тұрмыс та жаңа белеске көтеріледі деген сенім бар.
Бүгінгі күнгі басты мақсат – елдің бірлігін сақтап, ауылды дамыту бағытындағы мемлекет саясатын жүзеге асыруға барша жұрт болып атсалысу. Бізге артылған сенім – жауапкершілік. Сол сенімді ақтау – әрбір азаматтың парызы.
Ауылдың ажары мен келешегі елдің еңбегімен айқындалатынын естен шығармаған жөн.
Осы бағытта атқарылып жатқан жұмыстар округ тұрғындарының ынтымағын арттырып, жас буынға үлгі болары сөзсіз.
Асан Еренов,
аудандық мәслихат депутаты,жеке кәсіпкер.
