Әйтеке би ауданында су тасқынынан зардап шеккендерге келтірілген шығынды өтеу бойынша жиын өтті
Бүгін аудан әкімі Д.Тоғызбаевтың төрағалығымен су тасқынынан зардап шеккендерге материалдық шығынды өтеу жөніндегі жұмыс тобының отырысы өтті.
Аудан басшысы келтірілген зиянның орнын толтыру заңға сәйкес жедел түрде жүргізілуі керектігін атап өтті.
Сондай-ақ, жиында тұрғындар арасында түсіндірме жұмыстарын жүргізіп, келтірілген шығынның орнын толтыру бойынша жүргізіліп жатқан жұмыстар туралы тұрғындарды хабардар ету қажеттігі де айтылды.
Аудан әкімдігі Қазақстан Республикасының қолданыстағы заңнамасы аясында келтірілген материалдық шығынды бағалау және өтеу жөніндегі комиссия құрды. Ағымдағы жылдың 31 наурызынан бастап, жәбірленушілерден өтініш қабылдау басталды. 31 наурыз бен 6 сәуірі аралығында келтірілген залалды бағалау және өтеу жөніндегі комиссияда 86 өтініш қабылданып, қаралды.
Келтірілген залалды бағалау жәбірленуші мен бағалаушының қатысуымен жүргізіледі. Зиянды өтеу мөлшері бүлінген мүлікті қалпына келтіруге қажетті шығындарды немесе оның бүлінуіне байланысты мүліктің тозу сомасын немесе жоғалған мүліктің нарықтық баға бойынша құнын негізге ала отырып айқындалады.
Тұрғын үйлер бойынша жұмысты жедел жүргізуді бастау, өтініштерді объективті және жан-жақты қарау керек. Халыққа көмек дер кезінде болуы керек — деп түйіндеді кеңесті Д.Тоғызбаев.
