Ақкөл және Қарабұтақ ауылының тұрғындарымен кездесу өтті

Ақтөбе облыстық мәслихаты депутаты, Әйтеке би аудандық мәслихат төрағасы, «AMANAT» партиясы Әйтеке би аудандық филиалының атқарушы хатшысы Ақкөл және Қарабұтақ ауылының тұрғындарымен кездесті.

Ағымдағы жылдың 8 мамыр күні Ақтөбе облыстық мәслихаты депутаты Молдашев Дәурен Хайреденұлы іссапармен Әйтеке би ауданында болып, Ақкөл және Қарабұтақ ауылының тұрғындарымен кездесті.

Кездесу Ақкөл ауылының Абай атындағы жалпы орта білім беретін мектебінің акт залында өтті. Жиынды «AMANAT» партиясы Әйтеке би аудандық филиалының атқарушы хатшысы Әлібаев Марат Көпжасарұлы ашып, облыстық мәслихат депутатын таныстырды.

Кездесу барысында Әйтеке би аудандық мәслихат төрағасы, депутат Сейлханов Берік Дүйсенғалиұлы 2025 жылы атқарылған жұмыстар бойынша Ақкөл және Енбекту, Жарөткел ауылдарында есеп берді. Өз кезегінде Дәурен Хайреденұлы тұрғындар алдында сөз сөйлеп Ақкөл ауылында есеп берді, облыстық мәслихат сессияларында аудандағы маңызды мәселелерді көтеріп, оң шешілуіне атсалысып келе жатқанын атап өтті.

Кездесу барысында тұрғындар ауылдағы өзекті мәселелер мен ұсыныс-тілектерін көтеріп, айтылған мәселелері бойынша тиісті жауаптар айтылды. Іссапар аясында депутат мектептің тыныс-тіршілігімен танысып, асхана мен спортзалдың жағдайын қарап, дене шынықтыру пәні мұғалімдерінің ұсыныстарын тыңдады. Сондай-ақ жаңадан салынған Ақкөл ауылдық округі әкімдігі ғимаратының жай-күйі де назарға алынды.