Ақтөбе облысының Азаматтық орталығы ҮЕҰ-ларға консультативтік қолдауды күшейтті

Ақтөбе облысының ішкі саясат басқармасының қолдауымен «Ақтөбе облысының Азаматтық орталығы» ЗТБ «Ақтөбе облысының Азаматтық орталығының қызметін ұйымдастыру» жобасы аясында 2025 жылдың маусым-қараша айлары аралығында өңірдегі үкіметтік емес ұйымдарға тұрақты түрде консультативтік қолдау көрсетіп, азаматтық сектордың кәсіби дамуына ықпал етті. Осы кезеңде Азаматтық орталық 243 консультация өткізіп, 200-ден астам ҮЕҰ-ны қамтыды.

Консультациялар офлайн және онлайн форматта жүргізілді. Аудандық және ауылдық ұйымдардың ыңғайы үшін телефон арқылы қашықтан кеңесу мүмкіндігі қарастырылды. Қойылған сұрақтардың басым бөлігі гранттық қаржыландыруға өтінім дайындау, мемлекеттік әлеуметтік тапсырыс механизмдері, ұйым жарғысына өзгерістер енгізу, әлеуметтік кәсіпкерлікті дамыту және бухгалтерлік есеп мәселелеріне қатысты болды.

Қатысушылар арасында жүргізілген анкеталық талдау нәтижесі консультациялық қызметтің жоғары тиімділігін көрсетті. Респонденттердің 90 пайызы консультация сапасына толық қанағаттанғанын, 95 пайызы ақпараттың пайдалы болғанын, ал 75-80 пайызы өз мәселесін толығымен шешкенін атап өтті. Бұл көрсеткіштер жоба бойынша жоспарланған индикатордан жоғары.

Талдау барысында ҮЕҰ өкілдері гранттар мен мемлекеттік тапсырысқа қатысты тереңдетілген оқыту бағдарламаларына сұраныс бар екенін, практикалық құжат үлгілерін көбейтуді және аудандық ұйымдарға арналған онлайн-кеңестерді жиілету қажеттігін білдірді.

Консультативтік жұмыстың нәтижесінде төрт ҮЕҰ толықтай жабылу процесін аяқтап, 38 ұйым заңды мәліметтерін жаңартты. Көрсетілген қызметтер азаматтық сектордың құқықтық және ұйымдастырушылық сауаттылығын арттыруға, сондай-ақ өңірдегі ҮЕҰ-лардың жобалық мүмкіндіктерін кеңейтуге ықпал етті.

Азаматтық орталықтың жүйелі қолдауы өңір ҮЕҰ-ларының кәсіби әлеуетін нығайтып, азаматтық қоғам институттарының дамуына елеулі үлес қосты.