Бір ғана саламен шектелу өңірдің әлеуетін толық ашпайды, сондықтан өндірісті дамыту – экономикалық әртараптандырудың басты шарты

Президент Қасым-Жомарт Тоқаевтың «Түркістан» газетіне берген сұхбаты елдің әлеуметтік-экономикалық дамуына қатысты нақты басымдықтарды айқындап берді. Мемлекет басшысы сұхбатында:
«Экономиканың тұрақты өсуі өңірлердің белсенділігіне, олардың ішкі мүмкіндіктерін толық пайдалануына тікелей байланысты», – деп атап өтті. Бұл ойдың өзі жергілікті жердегі нақты жұмыстың, әсіресе аудан деңгейіндегі даму стратегиясының маңызын айқын көрсетеді.
Әйтеке би ауданы үшін бұл тұжырым ерекше мәнге ие. Аудан экономикасының негізі болып саналатын егін және мал шаруашылығы жыл сайын тұрақты өсім көрсетіп келеді. Ауыл шаруашылығы саласындағы еңбек өнімділігінің артуы, заманауи технологиялардың енгізілуі, шаруашылықтарды қолдауға бағытталған мемлекеттік бағдарламалардың нәтижесі – аудан тұрғындарының әл-ауқатын арттыруға тікелей ықпал етуде.
Сонымен қатар, Президент сұхбатында:
«Бір ғана саламен шектелу өңірдің әлеуетін толық ашпайды, сондықтан өндірісті дамыту – экономикалық әртараптандырудың басты шарты», – деген маңызды ой айтты. Бұл бағытта Әйтеке би ауданында соңғы жылдары оң өзгерістер байқалуда. Ауыл шаруашылығы өнімдерін өңдеуге бағытталған шағын өндіріс ошақтарының ашылуы, кәсіпкерлікті қолдау шаралары, жаңа жұмыс орындарының құрылуы аудан экономикасына қосымша серпін береді.
Өндіріс саласының дамуы тек экономикалық көрсеткіштермен шектелмейді. Ол ауыл шаруашылығы өнімдерінің қосылған құнын арттырып, жергілікті тұрғындарды тұрақты жұмыспен қамтуға, бюджет кірісін ұлғайтуға мүмкіндік береді. Бұл – Президент атап өткен экономикалық тиімділік пен әлеуметтік тұрақтылықтың өзара байланысын нақты іске асырудың көрінісі.
Атап айтқанда, егін және мал шаруашылығын одан әрі қолдай отырып, өндіріс саласына инвестиция тарту, кәсіпкерлерге қолайлы жағдай жасау, экономиканы әртараптандыруға бағытталған бастамаларды қолдау – алдағы кезеңнің негізгі басымдықтары болып қала береді.
Қорытындылай келе, Президенттің сұхбатында айтылған Аудан экономикасының тірегі саналатын ауыл шаруашылығымен қатар өндіріс саласының дамуы – өңірдің тұрақты өсімінің, халық тұрмысының жақсаруына бағытталған нақты нәтижелі жұмыстың айқын дәлелі. Бұл бағыттағы жүйелі іс-қимыл алдағы уақытта да ауданның әлеуметтік-экономикалық әлеуетін арттыра түсетіні сөзсіз.

Әйтеке би аудандық мәслихатының төрағасы. Б.Сейлханов