Дайындық жұмыстары жүйелі жүргізілуде

Алдағы сайлау науқанына дайындық Әйтеке би ауданында жоспарлы түрде жүргізілуде. Бүгінде сайлау комиссиялары ұйымдастыру жұмыстарына кірісіп, заңнама талаптарына сәйкес өз міндеттерін атқаруға дайындықтың негізгі кезеңдерін бастап кетті. Комиссиялардың материалдық-техникалық дайындығы, сайлаушылармен жұмыс және мамандардың біліктілігін арттыру мәселелері кезең-кезеңімен жүзеге асырылуда.
Аудан көлемінде барлығы 32 сайлау комиссиясы жұмыс істейді. Оның біреуі – аудандық аумақтық сайлау комиссиясы, ал 31-і – учаскелік сайлау комиссиясы. Жалпы комиссиялар құрамында 170 мүше бар. Оның 7-еуі аудандық аумақтық сайлау комиссиясының құрамында болса, 163-і учаскелік сайлау комиссияларында қызмет етеді. Қазіргі таңда комиссиялардың құрамында бос орын жоқ.
Учаскелік сайлау комиссиялары 3 тамыздан бастап өз жұмысына кірісті. Олар білім беру және мәдениет мекемелерінің бірінші қабаттарында орналасқан. Барлық учаскелерде дауыс беру процесін ұйымдастыруға қажетті жағдай жасалған. Сондай-ақ, мүмкіндігі шектеулі азаматтардың кедергісіз кіріп-шығуына да толық мүмкіндік қарастырылған.
Аудандық аумақтық сайлау комиссиясының төрағасы С.М. Таласбаевтың айтуынша, сайлау науқанына дайындық бекітілген күнтізбелік жоспарға сәйкес жүргізіліп жатыр.
– Қазақстан Республикасы Орталық сайлау комиссиясының күнтізбелік жоспарына сәйкес сайлау комиссияларының құрамы, олардың орналасқан жерлері, сайлау учаскелерінің шекаралары, үгіттік баспа материалдарын орналастыру және сайлаушылармен кездесулер өткізетін орындар туралы мәліметтердің барлығы аудандық «Жаңалық жаршысы» газетінде жарияланып, ресми сайтта орналастырылды. Бұл ақпараттардың тұрғындарға қолжетімді болуы – ашықтық пен жариялылық қағидатын қамтамасыз етудің маңызды бөлігі, – дейді С.М. Таласбаев.
Аудан бойынша сайлаушылар тізіміне 12 414 азамат енгізілген. 2 тамыз күні аудан әкімі сайлаушылар тізімін учаскелік сайлау комиссияларына тапсырды. Қазіргі уақытта комиссиялар осы тізімдерді нақтылау және олармен жұмыс жүргізу жұмыстарын жалғастырып отыр.
Сайлау комиссиялары мүшелерінің кәсіби даярлығына да ерекше назар аударылған. Осы жылдың 27 шілдесінде учаскелік сайлау комиссияларының төрағалары, олардың орынбасарлары мен хатшыларына арналған оқыту семинары өткізілді. Алдағы кезеңде бекітілген жоспарға сәйкес комиссиялардың қалған мүшелері де оқытудан өтеді.
Жалпы, ауданда сайлау науқанын ұйымдастыруға бағытталған жұмыстар жүйелі түрде жүргізілуде. Сайлау комиссияларының дайындығы, сайлаушыларға қолайлы жағдай жасау және заң талаптарын сақтау бағытындағы шаралар алдағы саяси науқанның жоғары деңгейде өтуіне негіз қалайды.

Е. Ырғызұлы, «Жаңалық жаршысы» газетінің тілшісі.