ЕЛ БОЛАШАҒЫН АЙҚЫНДАЙТЫН МАҢЫЗДЫ ҚАДАМ

Жалпыұлттық коалиция мүшелері Ақтөбе Көлік, байланыс және жаңа технологиялар колледжінің еңбек ұжымымен кездесті. Жиын барысында алдағы референдумның маңызы, жаңа Конституция жобасының мәні туралы жан-жақты түсіндірілді. Басқосу еркін пікір алмасу форматында өтті.
Кездесуге «Amanat» партиясының мүшесі, Ақтөбе Жоғары экономика, бизнес және құқық еуропалық колледжінің құрылтайшысы Талғат Төремұратов, «Республика» партиясының мүшесі, ауыл шаруашылығы тауарларын өндіру сервистік орталығы «MKR LINE» ЖШС директоры Саламат Наурызбаев және «Amanat» партиясының мүшесі, қалалық мәслихат депутаты Амантай Үмбетай қатысты.
Алдымен сөз алған Талғат Төремұратов алдағы референдумның тарихи маңызына тоқталды. Оның айтуынша, негізгі міндет — жаңа құжаттың мәнін халыққа барынша түсінікті жеткізу.
— Конституцияға қатысты ұсыныстар қоғам өкілдерімен, сарапшылармен кеңесе отырып дайындалды. Халықтан түскен пікірлер де ескерілді. Мемлекеттік басқару жүйесін жетілдіру, цифрландыру, ұлттық құқықтық дәстүрлерді жаңғырту сынды маңызды мәселелер қарастырылып отыр, — деді ол.
Сондай-ақ ол қазақ халқының құқықтық мәдениеті терең тарихтан бастау алатынын айтып, Тәуке ханның «Жеті жарғысы», Қасым хан дәуіріндегі құқықтық қағидалар секілді ұлттық мұра маңызына тоқталды. Оның айтуынша, негізгі заңда отбасы құндылықтарына да ерекше мән берілген.
Жиында сөз алған Саламат Наурызбаев қазіргі қоғамдағы экономикалық өзгерістер мен цифрландырудың маңызына тоқталды.
— Экономиканың тұрақты дамуы қаржы жүйесінің тиімділігімен тығыз байланысты. Банк жүйесі, несиелік саясат, кәсіпкерлікті қолдау — халықтың әл-ауқатына тікелей ықпал ететін фактор. Бүгінде цифрландыру көптеген қызмет түрін жеңілдетіп, халыққа қолжетімді етіп отыр, — деді ол.
Ал қала мәслихатының депутаты Амантай Үмбетай Конституцияны жаңарту уақыт талабы екенін айтып, қоғамдағы әр азаматтың жауапкершілігіне назар аударды.
— Конституция — елдің даму бағытын айқындайтын басты құжат. Сондықтан оған енгізілетін өзгерістер мемлекет болашағы үшін маңызды. Әсіресефф жас ұрпақты тәрбиелеуде педагогиканың рөлі ерекше. Технология дамыған заманда білім мен адамгершілік құндылықтар әрдайым бірінші орында болуға тиіс, — деді ол.
Сондай-ақ депутат азаматтардың қоғамдық-саяси өмірге бейжай қарамауы керегін атап өтті.
— Ел тағдырына қатысты маңызды шешім қабылданатын кезде әр азаматтың пікірі маңызды. Сол себепті қоғам өміріне белсенді араласып, өз таңдауымызды жасауымыз қажет, — деді Амантай Үмбетай.

Гүлжан БАЗЫЛҚЫЗЫ.