Құрылтай сайлауы күні дүниеге келген сәбилер

Ел тарихындағы айтулы күні облыстық перинаталдық орталығында төрт сәби дүниеге келді. 23 тамыз сағат 00:00-ден бергі дерек бойынша, оның үшеуі — қыз, біреуі — ер бала.

Нәрестелердің салмағы 3 325 грамм мен 4 265 грамм аралығында. Бәрінің де бойы бірдей — 52 сантиметр. Сәбилердің денсаулығы жақсы, жас босанған аналардың да жағдайы тұрақты.
Сайлау күні өмірге сәби әкелгендердің бірі— 38 жастағы қала тұрғыны Әйгерім Әбішева . Ол алтыншы сәбиін дүниеге әкеліп, көпбалалы ана атанды. Ал Алға ауданының Үшқұдық ауылынан келген 26 жастағы ана тұңғыш перзентін құшағына алды.

Қазіргі таңда орталығымызда төрт сәби дүниеге келді. Үш қыз, бір ұл. Нәрестелердің де, аналардың да жағдайы жақсы. Қазір орталықта толғатып жатқан әйелдер де бар, сондықтан көрсеткіш әлі де өзгеруі мүмкін. Қай күні болмасын дүние есігін ашатын әр сәбидің амандығы біз үшін үлкен қуаныш, — дейді облыстық перинаталдық орталығы директорының орынбасары Толқын Серғазина.
Көпбалалы ана атанған Әйгерімнің бұл төрт ұлдан кейінгі екінші қызы — Мәриям. Есімін сіңлісін көптен күтіп жүрген үлкен қызы Көзайым қойыпты. Айтуынша тұңғышының жасы — 18-де. Ел үшін маңызды күнде алтыншы сәбиін дүниеге әкелген ана бұл қуанышты күннің өзіне ерекше естелік болып қалатынын айтты.

Айдана НАҒАШЫБАЙҚЫЗЫ