Қызылорда қаласында өткен Ұлттық құрылтай – елдің саяси жаңғыру жолындағы маңызды кезеңдердің бірі болды.

Бұл жиында Мемлекет басшысы Қасым-Жомарт Тоқаев қоғам дамуының өзекті бағыттарын айқындап, Конституциялық және Парламенттік реформалардың мәні мен маңызын кеңінен тарқатты. Құрылтай алаңында айтылған ойлар Қазақстанның мемлекеттік басқару жүйесінде жүріп жатқан түбегейлі өзгерістердің логикалық жалғасы екенін көрсетті.
Президент өз сөзінде соңғы жылдары қабылданған шешімдердің басты мақсаты – әділетті, теңгерімді және халыққа есеп беретін мемлекет қалыптастыру екенін атап өтті. Бұл ұстаным ең алдымен Конституцияға енгізілген өзгерістер мен саяси реформалар арқылы жүзеге асуда.
Қызылордадағы Ұлттық құрылтайда Мемлекет басшысы жалпыхалықтық референдумның ел тарихындағы айрықша орнына тоқталды. Референдум – Қазақстан азаматтарының мемлекеттік басқару жүйесін жаңғыртуға тікелей қатысқан тарихи таңдауы. Бұл қадам қоғамның саяси жауапкершілігін арттырып, халықтың ел тағдырына бейжай қарамайтынын айқын көрсетті.
Референдум арқылы қабылданған Конституциялық өзгерістер суперпрезиденттік басқару үлгісінен бас тартуға, билік тармақтары арасындағы тепе-теңдікті күшейтуге жол ашты. Бұл – мемлекеттің даму бағытын тек билік емес, халықпен бірлесе айқындаудың нақты көрінісі.
Ұлттық құрылтайда көтерілген маңызды мәселелердің бірі – Парламенттің рөлін арттыру. Конституциялық реформалар нәтижесінде заң шығарушы органның өкілеттігі кеңейіп, оның саяси салмағы артты. Мәжіліс пен мәслихаттарға аралас сайлау жүйесінің енгізілуі, бірмандаттық округтердің пайда болуы – халықтың өкілдік билікке ықпалын күшейтті.
Мемлекет басшысы атап өткендей, күшті Бұл өзгерістер заң шығару сапасын арттырып қана қоймай, атқарушы билікке бақылау тетіктерін күшейтуге бағытталған. Нәтижесінде билік пен қоғам арасындағы кері байланыс нығая түсті.
Конституциялық сот және құқықтық мемлекеттің нығаюы
Құрылтайда сөз болған тағы бір өзекті тақырып – Конституциялық соттың қайта құрылуы. Бұл институт азаматтардың өз құқықтары мен бостандықтарын қорғауға тікелей мүмкіндік беретін маңызды құқықтық тетікке айналды. Конституциялық соттың қызметі – заң үстемдігін қамтамасыз етіп, мемлекеттік шешімдердің Конституцияға сай болуын қадағалау.
Президенттің пайымынша, заңға бағынған қоғамда ғана әділдік салтанат құрады. Осы тұрғыдан алғанда, Конституциялық сот – құқықтық мемлекеттің берік негізі.
Қызылордадағы Ұлттық құрылтайда айтылған ойлар реформалардың тек құрылымдық емес, идеялық және мазмұндық жаңғыру екенін көрсетті. Конституциялық және Парламенттік өзгерістер азаматтардың саяси белсенділігін арттырып, жауапты қоғам қалыптастыруға бағытталған.
Референдум арқылы басталған бұл өзгерістер жаңа қоғамдық келісімнің негізін қалады. Мемлекет пен халық арасындағы сенім нығайып, елдің дамуына қатысты шешімдерге азаматтардың тікелей қатысуы кеңейді.
Қорыта айтқанда, Қызылордада өткен Ұлттық құрылтайда көтерілген Парламенттік және Конституциялық реформаларға қатысты мәселелер – Қазақстанның саяси жаңғыру жолындағы жүйелі қадамдарының айқын дәлелі. Референдум арқылы қабылданған өзгерістер елді әділетті, ашық және теңгерімді басқару моделіне жетелеп, демократиялық дамудың жаңа кезеңін бастады. Бұл – болашақ ұрпақ үшін берік құқықтық және саяси негіз қалдыратын тарихи бетбұрыс.

Әйтеке би аудандық ардагерлер кеңесінің төрағасы, “Ауданның құрметті азаматы” А.Ермағанбет.