ӨЗ ТАҢДАУЫМЫЗДЫ ЖАСАЙЫҚ!

Зияткерлік спорт түрлері бойынша облыстық мамандандырылған балалар- жасөспірімдер спорт мектебі еңбек ұжымымен кездесуге коалиция мүшелері Азамат Егізбаев пен Арман Елдесовтер барды. Спорт мектебі бапкерлері, қызметкерлері — барлығы 30-дан астам адам қатысқан жиында Конституцияның жаңа жобасындағы өзгерістер туралы айтылды.
Заңгер Азамат Егізбаев 1995 жылы қабылданған қазіргі қолданыстағы Конституцияның өз міндетін толықтай орындағанын, елімізге жаңа уақыт талабына сай жаңа Ата Заң қажет болғанын айтты.
— Уақыт бір орында тұрмайды, уақыт өткен сайын қоғам да өзгереді. Ал жаңа талаптар бізге жаңа ережелер, жаңа міндеттер жүктейді. Конституция — әр адамның негізгі құқығы мен бостандықтары жазылған басты құжат. Адам дүниеге келгеннен бастап оның құқықтары осы заң арқылы қорғалады.
Қазір әлем жаңа технологиялық өзгерістердің алдында тұр. Соның бірі — жасанды интеллект. Бұл технологияның пайдасымен қоса қаупі де бар. Мысалы, қазір цифрландырудың салдарынан түрлі интернет-алаяқтық көбейіп кетті. Көптеген адамның атына олардың рұқсатынсыз несие рәсімделіп жатқан жағдайлар бар. Егер жаңа құжат қабылданса, әр адамның цифрлық деректері конституциялық деңгейде қорғалатын болады, — деген заңгер отбасы мен неке құндылықтары, адам құқығы мен бостандықтары, мемлекеттік басқару жүйесіндегі өзгерістер туралы айтты.
Ақтөбе облысы бойынша үкіметтік емес ұйымдар қауымдастығының басшысы Арман Елдесов жаңа жобадағы еңбек қатынастарына қатысты өзгерістерге тоқталды.
— Еңбек инспекторы ретінде жаңа жобадағы еңбек саласына қатысты мәселелерді айта кетейін. Еңбек қатынастары бойынша жұмысқа тұрған кезде еңбек шарты жасалады, егер жалақы төленбей қалса немесе қандай да бір еңбек құқығы бұзылса, онда жұмысшы еңбек инспекциясына шағым беріп, мәселені шешуге тырысатын-ды. Бірақ мұндай процестер ұзақ уақыт алады. Егер жаңа өзгерістер қабылданса, онда осы процедуралар жеңілдеп, шешім қабылдау әлдеқайда жылдам болады деген үміт бар, — деді ол.
Спикерлер қоғамда ажырасу санының көбеюі, қыз балаларды өз еркінен тыс алып қашу, сталкинг секілді жағымсыз әрекеттердің жиі кездесетінін, мұның бәрі қоғамдағы құндылықтардың өзгеріп жатқанын, жаңа құжатта осындай мәселелерді конституциялық деңгейде реттеу мәселесі қаралғанын айтты. Сондай-ақ тіл мәселесі, мемлекеттік басқару жүйесіне қатысты өзгерістер жөнінде де айтылды.
Коалиция мүшелері спорт мектебі ұжымын 15 наурызда болатын референдумға қатысып, өз таңдауын жасауға шақырды.

М.ТАБЫН.