ТӘУЕЛСІЗДІКТІҢ БІР ТЕТІГІ-ЭНЕРГЕТИКАДА

Біздің елдің жер асты түрлі қазба байлықтарға толы екені белгілі. Заманауи технологиялар дамығанша энергетикалық жүйе тұрақты берілуі үшін табиғи газ, көмір қолданылып келді. Жел мен су, күн арқылы да энергия алуға қадамдар жасалды.
Уақытқа сай заман өзгерді. Зардабы пайдасынан асып бара жатқасын көмір мен газды біртіндеп қолданыстан шығару мақсаты күн тәртібіне қойылды. Өйткені, жаһандық жылыну осы қазба байлықты тұрақты қолданудан туындағаны анықталды. Басқасының да бір жетіспестігі бар.
Ал, энергияның тапшылығы басқа елдің алдында кіріптарлыққа апарары сөзсіз. Себебі, өздерінде энергия өндіру мүмкіндігі жоқ болғасын, басқа мемлекетке қол жаюға тура келеді. Дамыған кезеңде энергетиканың қолданылмайтын саласы жоқ. Болашақта тапшылық айқын аңғарыла бастайды.
АЭС-тің салынуы көптеген проблемаларды шешуге ықпал етеді. Алдымен, экологиялық тазалығы, ауаны ластамайтыны және оған қажетті отын даярлауға қолданылатын уранның өзімізде өндірілетіне. Яғни, шикізат күйінде өзге елге экспортқа шығармай, өзіміздің игілігімізге жұмсалу мүмкіндігі ашылады.
Әрине, Чернобыль, Семей қасіреті кім-кімді де ойландырмай қоймас. Бірақ, қай құрылыс та жүргізілер кезінде оның қауіпсіздігі мен жұмыс жасау сапасы, тиімділігі сарапталып, сарапшылардың үлкен талқылауынан өтеді. Сондықтан, дақпыртқа ере беру қажет емес.
АЭС-біздің энергетикалық жүйеміздің тұрақтылығын сақтап, болашаққа бұл жағынан тапшылықты болдырмауға мүмкіндік беретін алып құрылыс болмақ.

Аудандық ақсақалдар кеңесінің төрағасы: Исатаев Бақыт