«Ұлттық қор — балаларға»: Үш жылда 6,5 млн баланың есепшотына 2,3 млрд доллар аударылды
АСТАНА. KAZINFORM — Қазақстан — табиғи байлықты азаматтардың бастапқы капиталы ретінде бекіткен аймақтағы алғашқы мемлекет. Бұл туралы Президент Қасым-Жомарт Тоқаев мәлімдеді.
— Біз арнайы конституциялық нормаға сүйене отырып, табиғи байлықты азаматтардың бастапқы капиталы ретінде бекіттік. Қазақстан — осындай бірегей бастаманы іске асырған аймақтағы алғашқы мемлекет. «Ұлттық қор — балаларға» бағдарламасы — соның айқын дәлелі, — деді Қасым-Жомарт Тоқаев Парламент палаталарының соңғы бірлескен отырысында.
Бұл жобаның тиімділігі жоғары: үш жылдың ішінде 6,5 миллион баланың есепшотына 2,3 миллиард доллар аударылған.
— Сондай-ақ біз қамқорлық шараларының нақты жалғасы ретінде «Келешек» жинақтау жүйесін іске қостық. Дарынды балаларға, соның ішінде халықаралық олимпиада жеңімпаздарына жүйелі түрде қолдау көрсете бастадық. Болашаққа инвестиция салу дегеніміз де — осы. Ал, айналамызда, яғни Еуразия құрлығында қай мемлекет әлеуметтік мақсаттарға осыншама қомақты қаражатты бөліп беріп жатыр? Жауап белгілі сияқты, — деді Президент.
Бұған дейін Президент Құрылтай сайлауын өткізу туралы арнайы Жарлыққа қол қоятынын, оның құрамына үздіктер ғана кіруі керегін айтқан еді.
30 жылда Парламент 3,5 мыңға жуық заң қабылдаған.
Сондай-ақ, Электрондық Парламентті дамытуға басымдық беріледі.
