Күні кеше ғана Бурабайда президентіміз Қасым-Жомарт Кемелұлының бастамасымен қолға алынған ұлтты ұйыстырған құрылтайдың IV отырысы өтті.
Күні кеше ғана Бурабайда президентіміз Қасым-Жомарт Кемелұлының бастамасымен қолға алынған ұлтты ұйыстырған құрылтайдың IV отырысы өтті. Ең алғашқы құрылтай 2022 жылы ұлттың ұясы саналған Ұлытауда, 2023 жылы түбі түркінің рухани астанасы Түркістанда, ал 2024 жылы Атырау қаласында өткен еді. Құрылтайдың маңызы сол — қарапайым тілмен айтқанда, еліміздің әртүрлі салаларында туындап жатқан түйткілдер талқыланып, оларды шешу жолдары, бағыттары қарастырылады. “Еститін мемлекет” идеясының жүзеге асқан түрі деуге әбден болады. Биылғы құрылтайда 2024 жылы өткен жиында жолға қойылған істердің орындалуы жөнінде баяндалып, ұлттың бірегейлігін әрі қарай нығайту бағытындағы жұмыстарды күшейте түсу қажеттігі айтылды. Осы ұлттық бірегейлікті нығайту жолында мәдениет саласының айрықша рөл атқаратынын, әсіресе, төл мәдениетіміздегі Әз-Наурыз мейрамының орны бөлек екендігін президентіміз құрылтайда ерекше атап өткенін еске салғым келеді. Сол үшін ұлттық мерекенің ауқымды деңгейде аталып өтуіне сіз бен біз болып атсалысу — құрылтайдың негізгі мәніне айналған ұлт ретінде ұйысуға апарар жол, қосылар үлес деп түсінсек әбден болады.
