Президент жедел басқару орталығын өзге өңірлерге үлгі етті

Цифрландыру қоғамдық қауіпсіздікті қамтамасыз ету жүйесінің ажырамас бөлігіне айналуда. Осы тұрғыда Қазақстан Республикасының Президенті Қасым-Жомарт Тоқаев Ақтөбе облысының тәжірибесін масштабтауға лайықты үлгі ретінде атап өтті.

Құқық қорғау органдарының кеңейтілген алқа отырысында сөйлеген сөзінде Мемлекет басшысы Ақтөбенің құқықтық тәртіпті цифрлық бақылау саласында нақты нәтижелер көрсетіп отырғанын айтты. Өңірде жұмыс істеп тұрған Жедел басқару орталығының жұмысын бағалап, осындай орталықтарды еліміздің барлық қала-аудандарында құруды тапсырды.

— Мен Ақтөбе облысына сапарым кезінде Жедел басқару орталығында болдым. Орталықта жасанды интеллектінің көмегімен қаладағы ахуалға тәулік бойы бейнебақылау жүргізіледі. Полиция қызметінің тиімділігін арттыратын осындай орталықтарды еліміздің барлық қаласы мен ауданында ашу қажет. Әкімдер бұл жұмысқа белсенді түрде кірісуге тиіс,—деп атап өтті Қасым-ЖомартТоқаев.

Мемлекет басшысы жасанды интеллект пен деректерді пайдалануға ерекше назар аударды. Оның айтуынша, бұл құралдар қауіптерді алдын ала анықтауға, құқықбұзушылықтардың қайталанатын оқиғаларын жоюға, ең бастысы—шешім қабылдаудағы субъективтілікті азайтуға көмектеседі. Жақын арада жаңа супер компьютер іске қосылады, бұл цифрлық талдаудың дамуына зор серпін береді.

Жалпы, Президент құқық қорғауоргандарында цифрлық шешімдерді жедел енгізу қажеттігін атап өтті. Бұл тек тиімділік пен жеделдікті арттырып қоймай, сыбайлас жемқорлықпен күресте де пәрменді құрал болмақ.

Akorda.kz.