Қашық сапарлардан қажымайтын қария

Т.Жүргенов ауылдық округінің әкімі Саламат Абилов телефон шалып, «веломарафоншы,теміржол саласының ардагері Жұмабай Отарғалиев деген қарияның ауылымызға келе жатқанын айта келіп, бірге күтіп алуымызды» сұраған болатын.Әрине, журналистік қалыппен қарсы болмадық
Күн де бұлтты, арасында жаңбыр да сіркіреп, беймаза қалыпқа түсіріп қояды.»Жай адам мынандай күндері ықтасын іздеп жүрсе, бұл кісі қалай келе жатыр екен?»деп қоямыз.Мұндай сапарға шыдам мен жігер керегі сөзсіз.
Біз уақытымызды босқа кетірмеу үшін интернеттен сапар иесі туралы мәліметті қарастыра бастадық.Шындығында, жетпіске келген қария нағыз мықтының өзі болып шықты.Велосипедпен еліміздің көптеген өңірінде болыпты, талай кездесулер өткізген,даталы мерекелер мен белгілі тұлғалардың мерйлі жасына байланысты арнайы сапарға шығып тұрады екен.
Облыстық «Диапазон»газеті былай жазады: «Ол барлығы 100-ге жуық теміржол станциясында болған, Қазақстанда 5 мың шақырымдай, қалада 2 мың шақырымдай жол жүрген.
Велосипедші бүкіл Қазақстан бойынша велосипедпен жүруді жоспарлап отыр.
-Мен Атыраудан, Сұлтан Бейбарыс ескерткішінен Орал бағытында Қобда арқылы, Хромтаудан темір жол бойымен бүкіл Қазақстанды басып өткім келеді. Ақтөбе облысын Қостанаймен, кейін Астанамен тікелей байланыстырған алғашқы филиалдың ашылғанына келесі жылы 20 жыл толады. Енді Хромтау — Қостанай — Астана жолымен елордаға барамыз. Бұрын Орск, Қорған арқылы жүру керек еді. 2004 жылы осы теміржол желісін тапсырдық, мен де сол құрылыста жұмыс істедім», — дейді ол
Қарағанды облысындағы сапарында сол жақтағы әріптестеріміз де велошабандоз ақсақалмен жолығып, сұхбат құрған екен.Сонда журналистерге «Мен Қазақстанды велосипедпен аралауды армандадым. Саяхатқа шығу үшін көп дайындалған жоқпын. Онсыз да күн сайын велосипедпен жүремін, маған бұл өте ұнайды. Бұл Қазақстан бойынша бірнші саяхат, 2–3 мың км жүріп өттім. Қазір мен күніне 12–15 сағат жүремін, содан кейін демаламын. Айналамда туған дала, табиғат, жақсы адамдар. Ауа-райы әрдайым қалыпты бола бермейді, бірақ бұл менің сапарымның қуанышын бұзбайды, керісінше шыңықтырады. Сонымен қатар, сапардың басында мен бата алдым, бұл көп көмектеседі. Мен әрқашан ардагерлер кеңесінің мүшелерімен байланыстамын, – деп жауап беріпті.Ал, ақтөбелік қаламдасымыз Ақмарал Мұқашеваның қариямен әңгімесінде Жұмағаң «Сапар алдында моральды тұрғыдан дайындаНдым. Жолда қиындық боларын сездім. Алайда достарымның арқасында жол қиындығын еңсердім. Велосипед те бұзылып, аяқ шаршап, жүруге мұрша болмаған шақта көлікпен қамтамасыз еткен достарыма айтар алғысым шексіз. Жолға жаз басталғалы дайындалдым. Жуырда өскемендік блогер маған жаңа велосипед сыйлады. Онымен жүру өте жылдам әрі қауіпсіз. Жолда ауа райының қолайсыздығы да әсер етпей қоймады. Ең бастысы, осы марафон арқылы Қазақстанның көрікті жерлерін аралап, ішкі туризмді насихаттау жоспарымда бар»-деген екен.

Біз осылай біраз мәліметке қанықтық.Сөйткенше болмады, сапар иесі де жанымызға жақындады.Ауыл әкімі ауылдық ақсақалдар кеңесінің төрағасы Ғарифолла Измұратов пен осы жолдар авторын таныстырып, аз-кем әңгімелестік,
-Мен бір күн бұрын Ақтөбе қаласындағы Әйтеке би ескерткіші жанынан сапарымды бастадым.Және мен күрежолмен емес, құрылысында қолтаңбам қалып, маңдай терім сіңген «Хромтау-Алтынсарин»бағытындағы теміжолды жағалап жүруді жоспарладым.Өйткені, биыл Әйтеке бидің туғанына 380 жыл және аталған теміржолдың іске қосылғанына жиырма жыл толып отыр.Мен сапарымды осы қос датаға арнадым.
Өздерің көріп отырсыңдар,күн жаңбырлы болып тұр.Бірақ, алған бағытымды өзгертпедім.Хромтаудың Сарысайынан бастап теміржол бойымен келе жатырм.Бұдан жиырма жыл бұрынғы жүріп өткен жолдарым.Бәрін көрдім, өзгерістерге назар салдым,теміржолшылармен сөйлестім.
Жоспарым атақты бидің атын алған аудан мен теміржол түйіскен Әйтеке би стансасында осы сапарымды тұйықтаймын»
Алда Қостанайлық веломарафоншылармен сапар жоспарланып отыр.Бұл да теміржол магистралініің атаулы күініне арналмақ.Қалғанын уақыт көрсетеді,-деді Жұмбай ағамыз.

Ертеңіне жетпіс жасқа келсе де, кәрілікке бой алдырмай, киіктің асығындай ширақ көрінетін сапар иесі аудандық әкімдіктің қызметкерлерімен, теміржол мамандарымен кездесіп, Әйтеке би аудандық музейінде болып, құрметті қонақ кітабында қолтаңба қалдырды.Кездесулерде «Біз салауаттылықты ұстанып, спортқа жақын болуларыңыз керек.Сонда ғана дені сау,ойы озық азаммат бола аласыздар.Сондықтан қашан да спортты серік етіп, ұлт патриоты болыңыңыздар.»тілектестігін білдірді.
З.БЕКОВ.