Ақтөбе облысында медициналық оңалту қызметі қарқынды дамып келеді

Медициналық оңалту – аурулардан, жарақаттардан, хирургиялық операциялардан және адамның өмір сүру белсенділігін шектейтін өзге де жағдайлардан кейін денсаулықты қалпына келтірудің маңызды кезеңі. Оңалтудың негізгі мақсаты – ағзаның жоғалған қызметтерін қалпына келтіру, өмір сапасын жақсарту және пациенттердің қоғамға әрі еңбек қызметіне белсенді оралуына ықпал ету.

Ақтөбе облысында медициналық оңалту қызметін меншік нысанына қарамастан 33 медициналық ұйым көрсетеді. Өңір тұрғындарына ересектер мен балалардың денсаулығын қалпына келтіруге бағытталған оңалту шараларының кең спектрі қолжетімді.
Бүгінде міндетті әлеуметтік медициналық сақтандыру жүйесі мен тегін медициналық көмектің кепілдік берілген көлемі шеңберінде облыс тұрғындарына оңалту қызметтерінің 216 атауы ұсынылады. Олардың қатарында бейінді мамандардың консультациялары, физиотерапиялық ем, емдік дене шынықтыру, эрготерапия, логопедиялық көмек, психологиялық қолдау және денсаулықты қалпына келтірудің заманауи әдістері бар.
Инсульт, миокард инфарктісі, ауыр жарақаттар мен операцияларды бастан өткерген пациенттерге, сондай-ақ созылмалы аурулары бар адамдар мен ерекше қажеттіліктері бар балаларға ерекше көңіл бөлінеді.

Медициналық оңалту қызметін дамыту Ақтөбе облысының денсаулық сақтау жүйесіндегі басым бағыттардың бірі болып табылады. Оңалту ұйымдары желісінің кеңеюі және көрсетілетін қызметтер тізбесінің артуы өңір тұрғындары үшін медициналық көмектің қолжетімділігі мен сапасын арттырып, олардың тезірек сауығып, өмір сапасын жақсартуына мүмкіндік береді.