Жетекші хирургтар бас қосты

Ақтөбеде «Заманауи хирургияның өзекті мәселелері» атты республикалық ғылыми-практикалық конференция өтті. Оған Қазақстанның жетекші хирургтары, ғалымдары мен медицина қауымдастығының өкілдері, сондай-ақ Беларусь, Түркия, Оңтүстік Корея, Өзбекстан және Қырғызстаннан келген мамандар қатысты.

Конференцияға қатысқан облыс әкімі Асхат Шахаров хирургияны дамыту заманауи технологиялар мен медициналық құрал-жабдықтармен қатар, білікті мамандар даярлауды да талап ететінін алға тартты.

— Бүгінгі басқосу—тәжірибе алмасатын кезекті жиын ғана емес, хирургия саласының бүгінгі ахуалын саралап, оның болашағына қатысты нақты бағыттарды айқындайтын маңызды кәсіби алаң.

Мемлекет басшысы Қасым-ЖомартТоқаевтың тапсырмасына сәйкес денсаулық сақтау жүйесін дамытуға аса көңіл бөлінуде. Соңғы үш жылда Ақтөбе облысында осы салаға 20,3 миллиард теңге бағытталып, 40 медициналық нысан салынды, тағы 40 ғимаратқа күрделі жөндеу жүргізілді.

Өңір үшін хирургиялық қызметті дамыту, заманауи технологияларды енгізу, мамандардың біліктілігін арттыру және медициналық көмектің сапасын қамтамасыз ету ерекше маңызға ие. Облыс стационарларында жыл сайын шамамен 50 мың пациентке хирургиялық көмек көрсетіліп, 12 мыңнан астам операция жасалады.

Медициналық кадрларды даярлау мен ғылымды дамытуда Марат Оспанов атындағы Батыс Қазақстан медицина университетінің маңызы зор. Ал халықаралық ынтымақтастық дәрігерлерімізге шетелдік озық тәжірибені меңгеруге мүмкіндік береді. Бүгін Ақтөбеге жиналған Қазақстанның жетекші хирургтары мен шетелдік мамандардың кәсіби тәжірибесі өңірдегі хирургиялық қызметті одан әрі дамытуға жаңа серпін беретініне сенімдімін, —деді Асхат Шахаров құттықтау сөзінде.

Конференцияның негізгі бағдарламасы пленарлық отырыстармен жалғасты. Бір алаңда хирургия, трансплантология, онкология, қантамырлары және кардиохирургия салаларының мамандары бас қосты. Мамандар трансплантология, инновациялар мен заманауи хирургия, бариатриялық хирургия, шұғыл хирургия мен пациент қауіпсіздігі сынды тақырыптарда өзара тәжірие алмасып, саладағы өзекті мәселелерді талқылады.

–Хирургия әлемдегі жалпы даму үрдістеріне сәйкес дамып келеді. Қазір хирургияның негізгі бағыты — мини-инвазивті әдістерді кеңінен қолдану. Бұған дейін лапароскопиялық хирургияға басымдық берілсе, қазір роботтандырылған технологиялардың дамуына байланысты роботтық хирургияға бетбұрыс байқалады.

Әлемдік медицинадан қалыс қалмауымыз керек. Дүние өзгеріп жатыр, сондықтан біз де хирургиядағы заманауи үрдістермен қатар дамуымыз қажет.

Қазақстан хирургиясы әлемдік медицинадан қалыс қалып отырған жоқ. Мәселен, трансплантация саласында туыстық трансплантация бойынша Орталық Азия өңірінде көш бастап келеміз. Ал мини-инвазивті технологияларға, соның ішінде лапароскопияға келсек, бұл әдістерді бұрынғы Кеңес Одағы аумағында алғашқылардың бірі болып 1991 жылы енгізе бастадық. Қазір роботтандырылған хирургияға қатысты технологиялар да елімізде белсенді енгізіледі. Дәрі-дәрмекпен қамтамасыз ету, жаңа емдеу сызбалары сияқты мәселелер де біртіндеп шешіліп, заманауи тәсілдер енгізілуде. Сондықтан бұл бағыттарда айтарлықтай артта қалушылық жоқ,— деді медицина ғылымдарының докторы, профессор, ҚР ҰҒА академигі Денсаулық сақтау министрлігініңбас хирургі, «А.Н.Сызғанов атындағы ҰҒХО» АҚ Басқарма Төрағасы Болатбек Баймаханов.

Ақтөбеге сапары барысында медициналық білім беру, мамандардың біліктілігін арттыру және кәсіби тәжірибе алмасу салаларындағы өзара байланысты дамытуға бағытталған меморандумға қол қойған Түркияның «Башкент» университетінің профессоры Седат ЙылдырымАқтөбеде сүт безі ауруларына ота жасағанын, жергілікті мамандармен тәжірибе алмасқанын айтты.

— Ақтөбедегі клиникада қажетті заманауи құрал-жабдықтар мен түрлі операцияларды жасауға мүмкіндік бар. Клиникаларыңыз туралы өте жақсы әсер алдық. Уақыт өте келе мұндағы медициналық мекемелердің мүмкіндігі одан әрі арта түсетініне сенемін. Өзара ынтымақтастық аясында тәжірибе алмасамыз. Бір-бірімізден үйреніп, бірге дамимыз. Бұл екі тарапқа да оң ықпал етеді. Бұл біз үшін де өте маңызды, — деді ол.

Конференция кезінде трансплантология және ағзаларды ауыстыру, оның ішінде бауыр және бүйрек трансплантациясы, саладағы парадигмалардың өзгеруі сынды мәселелер де талқыланды. Бішкек медициналық академиясының хирургия кафедрасының профессоры Жанек Белековтің айтуынша, трансплантология бойынша Қазақстан Орталық Азияда көш бастап тұр.

— Сондықтан біз мұнда келіп, осы бағыттағы жұмыспен танысып, тәжірибе жинақтауға мүдделіміз. Жалпы хирургия саласында бұрын Кеңес Одағы кезінде  медициналық қамтамасыз ету жүйесі бірізді жүргізілді. Ал Қазақстанда тәуелсіздік алғаннан кейін бұл салада түрлі бағдарламалар қолға алынып, қаржыландыру мен кадрлық саясатқа басымдық берілді. Соның нәтижесінде Қазақстан хирургия мен трансплантология бағытында алға шықты. Біз де осы тәжірибені ескеріп, өз елімізде аталған бағыттарды дамытуға күш салып жатырмыз, — деді ол.

Конференция барысында мамандар кәсіби тәжірибелерімен бөлісіп, заманауи жетістіктер мен ғылыми әзірлемелерді таныстырды. Сондай-ақ хирургиялық қызметті одан әрі дамыту және медициналық тәжірибеге жаңа тәсілдерді енгізу мәселелерін талқылады. Іс-шараға Сеул ұлттық университетінің профессоры Кванг Вунг Ли де онлайн форматта қатысты. Ол бұған дейінқ азақстандық мамандармен трансплантология саласында бірлесіп жұмыс істеген. Өз сөзінде профессор дәрігерлер арасындағы халықаралық ынтымақтастық пен тәжірибе алмасудың маңызын атап өтті.

Конференция аясында медицина мен хирургия саласының дамуына елеулі үлес қосқан мамандар марапатталды. «Ақтөбе облысының дамуына қосқан үлесі үшін» төсбелгісімен «Башкент» университетінің профессоры Мехмет Хаберал (Түркия), академиктер мен профессорлар Жақсылық Досқалиев пен Болатбек Баймаханов, профессор Сәлім Беркімбаев, сондай-ақ медицина ғылымдарының докторы, профессор Қайрат Сабыр марапатталды.

Ақтөбе облысы әкімінің Құрмет грамотасымен Қазақстан мен шетелден келген тағы он маман марапатталды. Олардың қатарында Өзбекстан, Қырғызстан, Беларусь елдерінен, сондай-ақ Астана, Алматы, Семей, Қызылорда және Тараз қалаларынан келген белгілі хирургтар мен ғалымдар бар. Марапат хирургиялық қызметті, медициналық ғылымды, халықаралық ынтымақтастықты және ғылыми-практикалық байланысты дамытуға қосқан үлесі үшін табысталды.

Конференция қорытындысы бойынша қатысушылар хирургиялық көмекті жетілдіру, мамандардың кәсіби құзыретін дамыту және заманауи медициналық технологияларды енгізуге қатысты алдағы жұмыстың негізгі бағыттарын айқындады. Мұндай кездесулер кәсіби байланыстарды нығайтып, өңірдегі хирургиялық қызметті одан әрі дамытуға мүмкіндік береді.

 Мейрамгүл РАХАТҚЫЗЫ.