*Ұлттық тарихи сананы қалыптастыруға бағытталған жүйелі ақпараттық саясат қажет*
«Әділет» партиясы фракциясының депутаты Шолпан Каринова Қазақстан Республикасының Мәдениет және ақпарат министрі Арман Қырықбаевқа депутаттық сауал жолдап, ұлттық тарихи сананы қалыптастыру және ақпараттық кеңістіктегі жалған мәліметтерге қарсы іс-қимыл мәселесін көтерді.
Депутат Мемлекет басшысының Құрылтай сессиясының ашылуында айтқан: «Ұлттың жадын күмәнді дерекпен, бұрмаланған мәліметпен улауға болмайды. Мұндай әрекет өткен күнге деген сенімді, келешекке деген үмітті әлсіретеді», – деген сөзін негізге алды. Оның айтуынша, бұл тарихи сананы қалыптастыру ісіне мемлекеттік деңгейде жүйелі көзқарас қажет екенін көрсетеді.
Бүгінде қоғамның, әсіресе жастардың тарихи санасы тек оқулықтар мен ғылыми еңбектер арқылы қалыптаспайды. TikTok, Instagram және YouTube секілді цифрлық платформалар негізгі ақпарат көздерінің біріне айналды. Осыған байланысты Қазақстан тарихы туралы қандай мәліметтің таралатыны, оның қандай дереккөзге негізделетіні және аудиторияға қалай ұсынылатыны ерекше маңызға ие.
Алайда әлеуметтік желілерде тарихи оқиғаларға қатысты күмәнді, жалған және бұрмаланған ақпараттар жиі кездеседі. Мұндай контентке дер кезінде кәсіби жауап беріп, қоғамға ғылыми тұрғыдан негізделген нақты деректер ұсынатын жүйелі тетік әлі де жеткіліксіз.
Депутат бұл мәселенің тарих саласымен ғана шектелмейтінін атап өтті. Халықпен кездесулер барысында азаматтардың елімізде жүзеге асырылып жатқан маңызды жұмыстар, реформалар мен олардың нәтижелері туралы толық біле бермейтіні байқалған. Бұл атқарылған жұмыстың жоқтығынан емес, оның мәні мен нәтижесінің халыққа қарапайым әрі түсінікті тілде жеткізілмеуінен туындап отыр.
Осыған байланысты мемлекеттік ақпараттық саясат тек бастамалар мен ресми мәліметтерді жариялаумен шектелмей, олардың мақсатын, нәтижесін және қоғам өміріне ықпалын түсіндіруге бағытталуы керек. Ақпараттық саясат тарихи сананы қалыптастыруға, ұлттық құндылықтарды дәріптеуге және елдегі өзгерістердің мәнін дұрыс түсіндіруге қызмет етуге тиіс.
Депутаттық сауалда Үкіметке ұлттық тарихи сананы мемлекеттік ақпараттық саясаттың басым бағыттарының бірі ретінде айқындау, Қазақстан тарихы туралы контенттің ғылыми негізділігі мен деректілігін қамтамасыз ететін жүйе қалыптастыру ұсынылды.
Сонымен қатар тарихи жад пен ұлттық құндылықтарды дәріптейтін заманауи медиа-жобаларды қолдау, TikTok, Instagram және YouTube платформаларында Қазақстан тарихын түсінікті әрі тартымды форматта насихаттайтын жобаларды іске асыру қажеттігі айтылды. Тарихқа қатысты жалған және бұрмаланған ақпараттарға жедел әрі кәсіби жауап беретін тиімді тетік құру да негізгі ұсыныстардың бірі болды.
Шолпан Каринованың пікірінше, бүгінгі ақпарат ертеңгі қоғамдық көзқарасты қалыптастырады. Сондықтан ақпараттық кеңістіктегі бәсеке – жай ғана аудитория үшін күрес емес, ұлттық санаға ықпал ету жолындағы маңызды жұмыс.
