Ауыл жасөспірімдері жарысады

Ақтөбе қаласындағы «Мұз айдыны» ғимаратында ауыл жасөспірімдерінің V жазғы ойындарының салтанатты ашылу рәсімі өтті.Туризм және спорт министрлігінің бастамасымен ұйымдастырылған спорттық додаға еліміздің барлық облысынан 2,5 мың жасспортшы қатысып жатыр.

Ауқымды спорттық шарада облыс әкімінің орынбасары Жолдас Батырхан қатысушыларға сәттілік тілеп, облыс үшін мұндай ауқымды жарысты өткізу мәртебе әрі жоғары жауапкершілік екенін айтты.

— Мемлекет басшысы Қасым-Жомарт Тоқаев халық денсаулығын жақсарту мәселесіне айрықша назар аудару қажеттігін атап өткен еді. Барлық жастағы азаматтар арасында бұқаралық спортты дамыту маңызды. Балалар үшін спорттық инфрақұрылымның барынша қолжетімді болуын қамтамасыз ету қажет. Бүгінде облыста осы міндетті іске асыру бағытында ауқымды жұмыс жүргізіліп жатыр. Соңғы үш жылда өңірде 31 спорт нысаны пайдалануға берілді. Оның 24-і ауылдық жерде орналасқан.Сонымен қатар ірі жобалар да жүзеге асырылып жатыр. Қазіргі таңда 35 мың көрерменге арналған футбол стадионы мен 5 мың орындық көпфункционалды спорт кешенінің құрылысы басталды. «Самұрық-Қазына» қорының қолдауымен дене шынықтыру-сауықтыру кешені де салынуда.Еліміздің әр азаматы отаншыл, бірлік пен ынтымақты бұзбайтын, заң мен тәртіпті бұлжытпай сақтайтын, әділ әрі жауапкершілігі мол, еңбекқор, жаңашылдыққа жаны құмар болуы маңызды, — деді Жолдас Батырхан.

Жарыстың мақсаты — жасөспірімдер арасында бұқаралық спортты дамыту, спорттық шеберлікті арттыру және ауылдық жерлердегі болашағы зор спортшыларды анықтау. Бір апта бойы қатысушылар спорттың он түрінен — асық ату, 3×3 баскетбол, волейбол, грек-рим күресі, дзюдо, еркін күрес, қазақ күресі, тоғызқұмалақ, үстел теннисі және футзалдан бақ сынайды.

Ойынды өткізу орны ретінде Ақтөбе қаласының таңдалуы кездейсоқ емес. Өңірде, оның ішінде ауылдық жерлерде де спорттық инфрақұрылымның дамуы қарқынды. Осындай деңгейдегі жарысты өткізу жас спортшыларды іріктеу мен даярлауға мол  мүмкіндік береді.

Ұйымдастырушылардың айтуынша, бұл ойынның елдің, соның ішінде олимпиада резервін қалыптастыруда маңызы зор.

Жас спортшылар үшін ауыл ойындары — республикалық деңгейге шығуға, еліміздің өзге өңірлерінен келген қарсыластарымен күш сынасуға мүмкіндік береді. Мұндай жарыстар спорттық нәтижелермен қатар, тәртіп, командалық рух, жауапкершілік және қарсыласқа деген құрметті қалыптастыруға ықпал етеді.

Батыс Қазақстан облысының Бөрлі ауданына қарасты Ақсу ауылынан келген 9-сынып оқушысы Мардан Маратовтың дзюдомен айналысып жүргеніне үш жылдай уақыт болған. Жас спортшыны бұл жарысқа бапкерлері Төлеген Жұмағазиев, Теміржан Күлбаев және Қасым Қожанов тыңғылықты дайындап алып келген.

Бұған дейін республикалық додаларда үздік бестіктің қатарынан көрініп жүрген Мардан үшін мұндай жарыстардың маңызы зор. Оның айтуынша, әр сайыс — тәжірибе жинақтап, қарсыластарын танып, шеберлігін шыңдай түсудің жолы.

Бұл жарыста Батыс Қазақстан облысының намысын дзюдодан барлығы 17 жас спортшы қорғайды. Олардың әрқайсысы татамиге жеңіс үшін шығып қана қоймай, жинаған тәжірибесін келесі жарыстарда кәдеге жаратуға ниетті.

Көршілес Атырау облысынан да спортшылардың қарасы қалың. Өңірден жарысқа спорттың 10 түрінен 140-қа жуық спортшы келген. Солардың қатарында үстел теннисінен бақ сынайтын жасөспірімдер де бар. Атырау құрамасын жаттықтырушылары Аслан Мырзахметов пен Досбек Қызылқұлов бастап келген. Команда сапында төрт ұл және төрт қыз бала өнер көрсетеді.Атыраулық жас теннисшілер бұған дейін Талдықорған қаласында өткен осындай жарыста жүлделі екінші орынға ие болған. Енді олар бұл жолы да жақсы нәтиже көрсетуге талпынып отыр. Бапкерлердің айтуынша, мұндай жарыстар жас спортшылардың бәсекелік тәжірибесін арттырып қана қоймай, өз күшіне деген сенімін нығайтады.

Ауыл жасөспірімдерінің V жазғы ойындары 22 қыркүйекке дейін жалғасады.

Арайлым НҰРБАЕВА.