Бала қауіпсіздігі — ортақ міндет

Ақтөбе қаласындағы №37 орта мектепте «Заң және тәртіп — қауіпсіз мемлекеттің негізі» тақырыбында «Әкелер» мектебі мен қамқоршылық кеңес мүшелерінің бірлескен жиыны өтті.

Іс-шараның мақсаты — жас ұрпақтың құқықтық сауатын арттыру, балалардың қауіпсіздігін қамтамасыз ету, ата-аналардың тәрбиеге деген жауапкершілігін күшейту және мектеп пен отбасы арасындағы байланысты нығайту.
Алдымен сөз алған мектеп директоры А.Назиков заңға құрмет қалыптастыруда отбасындағы тәрбиенің маңызына тоқталды. Облыстық балалар құқықтарын қорғау басқармасының бас маманы Ж.Өсербаева балалардың құқықтарын қорғау мен олардың мүдделерін сақтаудың маңызын түсіндірді. Ал қалалық білім бөлімінің басшысы М.Қосымбаева бала құқығын қорғаудың ортақ міндет екенін атап өтті. Сондай-ақ жиында Ақтөбе қаласы Астана ауданының №1 қалалық полиция бөлімінің полиция майоры Н.Ерғабылов та сөз алып, кәмелетке толмағандар арасындағы құқықбұзушылықтың алдын алу мәселесіне тоқталды. «Әкелер» мектебінің төрағасы А.Балмағанбетов бала тәрбиесіндегі әкенің рөлі туралы айтты. Ол баланың құқығын қорғау, дұрыс тәрбие беру және қауіпсіздігін қамтамасыз етуде әкенің жауапкершілігі зор екенін атап өтті.
Кездесуде заң талаптарын сақтаудың маңызы, жасөспірімдер арасындағы құқықбұзушылықтың алдын алу, қауіпсіз орта қалыптастыру мәселелері талқыланды.
Жиынға қатысушылар бала тәрбиесі мектеп пен отбасының ортақ жауапкершілігі екенін атап өтті. Баланың бойына жауапкершілік, адалдық, тәртіп пен заңға құрмет құндылықтарын сіңіруде ата-ананың үлгісі мен мектептің тәрбиелік жұмысы маңызды екені айтылды.
Мұндай кездесулер мектеп, отбасы және қоғам арасындағы ынтымақтастықты нығайтып, балалардың құқықтарын қорғау мен қауіпсіздігін қамтамасыз етуге ықпал етеді.

Гүлжан БАЗЫЛҚЫЗЫ.