Тәртіпті жастар — қауіпсіз болашақ
Ақтөбе жоғары политехникалық колледжінде оқушылардың құқықтық сауаттылығын арттыруға арналған «Тәртіпті жастар — қауіпсіз болашақ» тақырыбында кездесу өтті. Полиция қызметкерлері жастарға құқықбұзушылықтың алдын алу, қоғамдық тәртіпті сақтау және заң алдындағы жауапкершілік туралы түсіндірді.
Кездесуге Ақтөбе қаласы полиция басқармасының қызметкерлері — криминалдық полиция бөлімінің аға жедел уәкілі, полиция капитаны Ернар Досанов, анықтау бөлімінің бастығы, полиция капитаны Ернар Ізбасар және аға инспектор Гүлмира Шитанова қатысты.
Кездесуде кәмелетке толмағандарға қатысты заң талаптарына да назар аударылды.
— Қолданыстағы заңнамаға сәйкес, кәмелетке толмағандардың заңды өкілінсіз ойын-сауық орындарында түнгі сағат 22.00-ден таңғы 06.00-ге дейін жүруіне жол берілмейді. Сондай-ақ олардың заңды өкілінсіз тұрғынжайдан тыс жерде сағат 23.00-ден 06.00-ге дейін жүруіне шектеу қойылған. Бұл талаптар орындалмаған жағдайда заңнамада кәмелетке толмағандардың заңды өкілдеріне, ал тиісті жағдайда ойын-сауық мекемелерінің иелеріне де әкімшілік жауапкершілік қарастырылған,— деді аға инспектор Г.Шитанова.
Полиция қызметкерлері құқықбұзушылықтың алдын алу мақсатында қала аумағында профилактикалық және рейдтік жұмыстар жүргізілетінін де атап өтті. Мұндай шаралар кезінде көшелер, қоғамдық орындар, ойын-сауық орындары мен жастар көп жиналатын орындар назарға алынады. Негізгі мақсат — құқықбұзушылықтың алдын алу, түнгі уақытта заңды өкілінсіз жүрген кәмелетке толмағандарды анықтау және олардың қауіпсіздігін қамтамасыз ету.
Кездесу барысында оқушылар полиция қызметкерлеріне өздерін қызықтырған сауалдарын қойып, күнделікті өмірде кездесетін құқықтық жағдайлар жөнінде жауап алды.
А.НАҒАШЫБАЙҚЫЗЫ.
