Қауіпсіз қоғам — ортақ жауапкершілік

Ақтөбе қаласындағы Студенттер сарайында «Жастар және қауіпсіз қоғам» тақырыбында жастармен кездесу өтті.

«Заң мен тәртіп» идеологиясы аясында ұйымдастырылған шараның мақсаты — жастардың құқықтық мәдениетін қалыптастыру, құқықбұзушылықтың алдын алу және қауіпсіз қоғам құрудағы жауапкершілігін арттыру.
Кездесуді «АТАМЕКЕН» студенттік отрядтары жастар қоғамдық бірлестігі ұйымдастырды.
Кездесуде облыстық полиция департаментінің киберқылмысқа қарсы іс-қимыл басқармасының өкілі Берік Боранбаев интернет-алаяқтықтың кең тараған тәсілдері мен оның зардаптары туралы айтты. Оның сөзінше, алаяқтар әлеуметтік желілерде бейнероликтерді көріп, оларға лүпіл басу немесе телефон нөмірлерін тіркеу арқылы оңай табыс табуға уәде береді. Алайда мұндай ұсыныстардың артында азаматтардың жеке деректерін иемдену және оларды қылмыстық әрекеттерге тарту қаупі бар.
Спикер жастарға банк карталары мен шоттарын бөгде адамдарға бермеуді, күмәнді ұсыныстарға сенбеуді ескертті. Әсіресе дропперлік әрекеттерге қатысу азаматты заң алдында жауапкершілікке тартуы мүмкін екенін түсіндірді. Мұндай жағдайларда адам өзгенің заңсыз қаржы операцияларына қатысып қана қоймай, келтірілген шығынды өтеуге де міндеттелуі ықтимал.
Сондай-ақ кездесуде спорттың жастар тәрбиесіндегі рөлі де сөз болды. Жоғарғы спорт шеберлігі мектебінің директоры, Қазақстан Республикасының еңбек сіңірген спорт шебері Руслан Ыбыраев спорт адамның бойында тәртіпті, табандылықты және мақсатқа ұмтылуды қалыптастыратынын атап өтті.
Оның айтуынша, спортпен жүйелі айналысу жастардың бос уақытын тиімді ұйымдастыруға, теріс әдеттерден аулақ болуға және өмірлік мақсатын айқындауға көмектеседі. Спорттық жетістіктерге жету үшін күн тәртібін сақтап, жаттығу мен оқуды қатар алып жүру қажет.
Басқосу барысында өзге де спикерлер жастардың құқықтық сауатын арттыру, қаржылық қауіпсіздік және қоғам алдындағы жауапкершілік мәселелеріне тоқталды. Қатысушылар өздерін толғандырған сауалдарын қойып, мамандардан жауап алды.

Арайлым НҰРБАЕВА