Президенттің 2024 жылғы Жолдауын іске асыру: ауыл шаруашылығы саласына негізгі капиталға салынған инвестициялар 442,7 млрд теңгеге жетті

Ауыл шаруашылығын дамыту үшін тек еңбек пен тәжірибе жеткіліксіз, оған қоса қаржы салу да аса маңызды. Президент Жолдауында бұл бағытқа ерекше назар аударылып, саланы жаңғыртуға инвестиция тарту міндеті қойылған болатын. Бүгінде бұл тапсырмалар нақты іске асуда.
2025 жылғы қаңтар–шілде айларында ауыл шаруашылығы саласына негізгі капиталға салынған инвестициялар 442,7 млрд теңгеге жетті. Бұл көрсеткіш өткен жылмен салыстырғанда 26,5%-ға көп. Ал азық-түлік өнімдері өндірісіне бағытталған инвестициялар 104,2 млрд теңгені құрап, 48%-ға артты.
Бұл қаражат ауылдағы өндірісті жаңғыртуға, заманауи технологияларды енгізуге, жаңа зауыттар мен цехтар ашуға жұмсалуда. Қарапайым тілмен айтқанда, шаруа қожалықтары мен кәсіпорындар бұрынғы ескі әдіспен емес, заманауи техника, автоматтандырылған құралдар арқылы жұмыс істей бастады. Нәтижесінде өнім сапасы артып, еңбек өнімділігі көтеріледі.
Мемлекет басшысы атап өткендей, аграрлық салада субсидиялаудан қолжетімді несиелеуге көшу маңызды қадам болды. Бұл банктер мен жеке инвесторлардың қаражатын тартып, бюджет мүмкіндіктерін тиімді пайдалануға жол ашты.
Яғни бүгінгі инвестициялар – ертеңгі тұрақты даму мен ауылдағы тұрмыс сапасының артуының кепілі. Президент Жолдауында айтылғандай, ауыл шаруашылығын қолдау – елдің азық-түлік қауіпсіздігі мен экономикалық өсімінің негізі.

Хамитов Талгат, «Кәсіпкерлердің құқықтарын қорғау қауымдастығы» заңды тұлғалар бірлестігі Басқарма төрағасы, Ақтөбе қалалық мәслихатының депутаты