Зорлық-зомбылықсыз болашақ
Ақтөбе гуманитарлық колледжінің акт залында «Нашақорлыққа жол жоқ — зорлық-зомбылықсыз болашақ» тақырыбында жиын өтті.
Басқосуға облыстық полиция департаментінің есірткі қылмысына қарсы іс-қимыл басқармасының бөлім бастығы Азамат Қияшев, Ақтөбе қаласының жұмыспен қамту және әлеуметтік бағдарламалар бөлімінің басшысы Мақпал Тұрмағамбетова, қоғам қайраткері әрі кәсіпкер Марина Ерғазина, «Дәріс — 2016» қоғамдық қорының директоры Гүлнұр Едігеева және колледж ұжымы мен оқушылар қатысты.
Кездесу алдымен №83 жалпы білім беретін орта мектеп оқушыларының «Нашақорлық пен зорлық-зомбылық — қоғам дерті» атты сахналық қойылымымен басталды. Көрініс қоюшылар қоғамдағы өзекті мәселелерді қозғап, жастарды зиянды әдеттерден аулақ болуға шақырды.
Ақтөбе қаласы тұрмыстық зорлық-зомбылық құрбандарына арналған орталығының директоры, модератор Райса Байлиева сөз алып, жиынның маңызына тоқталды.
— Бүгінгі басқосу — жастардың қауіпсіздігі мен болашағына бейжай қарамайтын азаматтардың ортақ алаңы. Нашақорлық пен зорлық-зомбылық тұтас қоғамның мәселесіне айналып отыр. Сондықтан оның алдын алып, жасөспірімдерге дұрыс бағыт-бағдар беруіміз қажет. Әрбір жас өз өміріне жауапкершілікпен қарап, саналы таңдау жасай білуге тиіс, — деді ол.
Облыстық полиция департаментінің мәліметінше, жыл басынан бері облыс аумағында 520 келі есірткі тәркіленген. Оның 517 келісі — шөп тектес марихуана, ал үш келіден астамы — синтетикалық есірткі. Сондай-ақ ол есірткі таратушылардың жастарды көбіне телефон мен әлеуметтік желіде арбауға тырысатынын ескертті.
— Әлеуметтік желіде жеңіл ақша табуды ұсынатын күмәнді хабарландырулар мен ұсыныстарға сенбеңіздер. Мұндай әрекеттердің соңы қылмыстық жауапкершілікке әкелуі мүмкін. Былтыр 16 жастағы мектеп оқушысы есірткі қылмысына байланысты алты жарым жылға бас бостандығынан айырылды. Қазақстан Республикасы Қылмыстық кодексінің 296-бабы есірткі заттарын заңсыз сақтауға, ал 297-бабы өткізуге байланысты жауапкершілікті қарастырады. Қазіргі басты міндеттеріңіз — сапалы білім алып, болашақтарыңызға берік негіз қалау, — деді Азамат Қияшев.
Кездесу барысында облыстық полиция департаментінің кинологиялық қызмет мамандары қызметтік иттердің жұмысын көрсетті. Көрсетілім барысында «Барон» есімді ит оқушының сөмкесі мен қалтасына жасырылған есірткі имитаторын лезде тауып алды.
Шара соңында колледждің белсенді оқушылары «Еркін микрофон» алаңында қонақтарға сұрақ қойды. Ашық диалог жастардың өзекті мәселелерді еркін талқылауына мүмкіндік берді.
А.НАҒАШЫБАЙҚЫЗЫ.




