Ақтөбе облысындағы спорттық инфрақұрылымды дамыту мәселесі – жіті бақылауда

Үстел теннисінің орталығында өткен кездесу тақырыбына Мемлекет басшысы Қасым-Жомарт Тоқаевтың Ұлттық құрылтайдың төртінші отырысында спорт саласын дамытуға қатысты берген тапсырмалары арқау болды. Яғни, өңірдегі спорт инфрақұрылымын, шағын ойын алаңдарынан бастап ауқымды заманауи стадиондарға дейінгі дамыту мәселесі талқыланды. Кеңеске Ақтөбе облысының әкімі Асхат Шахаров, жауапты сала басшылары, футбол федерациясының, «Ақтөбе» футбол клубы және аудандар мен спорт мектептерінің өкілдері қатысты.
Өңір басшысы өз сөзінде дені сау, белсенді және саналы ұлтты қалыптастыру құралы ретінде бұқаралық спорттың маңызын атап өтті. Футболдың дамуына баса назар аударылды, өйткені спорттың бұл түрі жастардың жаман әдеттен қашық жүруіне, ал бойларына тәртіп пен командалық рухты қалыптастыруына өзіндік септігін тигізеді.
«Спортты дамыту – біздің жұмысымыздағы басым бағыттардың бірі. Біз бұқаралық спортқа, әсіресе жастарды тәрбиелеуге және салауатты өмір салтын қалыптастыруға ықпал ететін футболға ерекше назар аударамыз. Президент ұлттық құрылтайда атап өткендей, кәсіби және бұқаралық спорт арасындағы тепе-теңдікті сақтау маңызды. Ақтөбеде 35 мың орындық жаңа заманауи стадион салынады. Бұл тек спорт алаңы ғана емес, сонымен қатар аймақтың мәдени орталығына айналады. Мүмкіндігі шектеулі жандарға арналған мамандандырылған кешеннің құрылысы да аяқталуға жақын. Бұл – әділ және инклюзивті қоғам құруға қосқан үлесіміз. Өңірде футбол спортын дамытуға барлық жағдай жасалған. Алайда, әлі де кемшін тұстарымызды жан-жақты саралап, бүгінгі күн талабына сай етуіміз керек. Ақтөбе әрдайым өзінің футбол мәдениетімен танымал болған және біз осы дәстүрді сақтап, дамытуымыз қажет. Спорт облыстың әрбір тұрғынына қолжетімді болатындай етіп, жұмыс істеуді жалғастырамыз», – деді өңір басшысы.
Дене шынықтыру және спорт басқармасының басшысы Мейрамбек Махамбетов облыста 1 705 спорт нысаны жұмыс істейтінін, оның ішінде 373 футбол алаңы, оның 218-і ауылдық жерде орналасқанын айтты. 12 стадион бар, оның 6-ы – аудан орталықтарында. Қазір 79 елді мекенге спорт алаңдары қажет. Бұл мақсатта алдағы екі жылда демеушілік қаражат пен жергілікті бюджет есебінен футбол алаңдарының құрылысы жүргізілмек.
Мектеп және студенттер лигалары, сондай-ақ «Дара бала» бағдарламасы жүзеге асырылуда. Облыста спортпен жүйелі түрде айналысатындардың саны 43%-ға жетті.
Мейрамбек Махамбетов сондай-ақ халықаралық стандарттарға сәйкес келетін 50 метрлік бассейні, спорттық және көркем гимнастикаға арналған залдары, футзал, волейбол және баскетбол үшін спорт кешенін құру жобасы туралы айтты. Жыл соңына қарай мүгедектерге арналған спорт кешенінің құрылысы аяқталады. Онда спорттың 20-дан астам түрін дамыту жоспарланған.
Отырыс аясында облыстық футбол федерациясының президенті Асхат Қалжанов та баяндама жасады. Ол балалар мен жасөспірімдер футболын дамыту, жаттықтырушылардың біліктілігін арттыру және ауылдық жерлерде бұқаралық турнирлерді кеңейтуге баса назар аудара отырып, жуырда атқарылатын жұмыстың негізгі бағыттарына тоқталды.
«Ақтөбе» футбол клубының басқарма төрағасы Санат Шалекенов балалар академиясынан кәсіби командаға дейінгі дайындықтың толық циклін қамтитын клубтың құрылымы туралы айтып өтті. Ол ұлттық құрамалар үшін резервті тәрбиелеудегі клубтың рөліне тоқталды. Жастар құрамаларының жетістіктерін атап, инфрақұрылым мен ойыншыларды даярлау әдістемелерін одан әрі дамыту жоспарларын ұсынды.
Балалар футбол жаттықтырушысы Арслан Ақаев балалар мен жасөспірімдерді тікелей тұрғылықты жері бойынша спортпен шұғылдануға тартуға бағытталған «Аула Лигасы» жобасын ұсынды. Лига мектеп пен аула алаңдарын пайдалана отырып, минималды шығындармен шағын турнир форматында жұмыс істейді. Бұл тәсіл жастарға, әсіресе ауылдық және шалғай аудандарда футболдың қолжетімділігін кеңейтуге мүмкіндік береді.
Хромтау ауданының әкімі Нұрхан Тілеумұратов футбол инфрақұрылымын дамыту, оның ішінде жаңа алаңдар салу және жастар турнирлерін өткізу бойынша жүйелі жұмыстар туралы хабарлады. Ол аудан тәрбиеленушілерінің республикалық деңгейдегі жетістіктерін атап өтіп, жергілікті таланттарды қолдауды тілге тиек етті. Екінші лига командасын құру және Хромтау футбол клубын жандандыру туралы ұсынысын да жеткізді, бұл өз кезегінде ауылдық жерлерден келген жас футболшыларға кәсіби деңгейге шығуға септігін тигізбек.
Кеңес қорытындысы бойынша өңірде футболды дамыту жөніндегі Кеңес құру, «Ақтөбе» футбол клубының қала музейлерінде бұрыштарын құру, Хромтау ауданының аумағында ҚР чемпионатының футболдан екінші лигасына қатысу үшін футбол клубын ашу, «Аула Лигасы» және «Мектеп Лигасы» жобаларына, студенттер лигаларына жастарды спортқа тарту жобалары қолдау тапты.
Қорытындылай келе, облыс әкімі бұқаралық және балалар-жасөспірімдер футболын дамыту жергілікті атқарушы органдардың жұмысындағы басымдықтардың бірі болып қалуға тиіс екенін алға тартты. Инфрақұрылымды нығайтуды жалғастыру, қалада және ауылда спортпен айналысуға тең қол жеткізу үшін жағдайлар жасау, жастарды спорттық өмірге белсенді тарту қажет. Бұл бағыттағы жұмыс футбол федерациясымен, клубтармен, жаттықтырушылар қауымдастығымен және өңірдің бастамашыл тұрғындарымен тығыз қарым-қатынаста жалғасатын болады.