Болашақ құрылысы — білікті кадрлар қолында
Мемлекет басшысы Қасым-Жомарт Тоқаевтың Қазақстан халқына Жолдауы – ел дамуының жаңа кезеңін айқындайтын стратегиялық құжат. Мемлекеттің ішкі тұрақтылығын нығайту, экономикалық әлеуетті арттыру және халықтың әл-ауқатын жақсартуға бағытталған түбегейлі реформалардың негізгі бағдарлары белгіленді.
Президенттің 2027 жылды «Жалпыхалықтық ауқымды құрылыс жылы» деп жариялау туралы ұсынысының әлеуметтік мәні зор. Салынатын әр мектеп, аурухана, жол, кітапхана мен спорт кешені білікті маманның білімі мен еңбегіне сүйенеді. Еуразия ұлттық университетінің сәулет-құрылыс факультетінде біз осы бағыттағы кәсіби кадрларды даярлаймыз. Студенттеріміз ғимараттар мен құрылыстарды жобалауды, құрылыс технологияларын, инженерлік жүйелер мен желілерді, цифрлық жобалауды меңгереді.
Болашақ құрылысшыларға үнемі айтатынымыз: сіздердің жауапкершіліктеріңіз тұрғызған ғимараттың қабырғасымен шектелмейді. Сіздер тұрғындардың тұтас экожүйесін қалыптастырасыздар. Үйдің жылуы, судың үздіксіз келуі, баланың мектепке қауіпсіз жетуі, қоғамдық кеңістіктің қолайлылығы — бәрі инженерлік шешімнің сапасына байланысты. Кәсіби адалдық пен адам өміріне жауапкершілік студент кезден орнығуы керек.
Мұндай даярлықты халықаралық тәжірибемен ұштастырып келеміз. Құрылыс саласында Лейпциг қолданбалы ғылымдар университетімен, Гренобль Альпы университетімен білім беру бағдарламаларымыз бар. Біз үшін халықаралық әріптестіктің нәтижесі — түлектің озық инженерлік білімді Қазақстанның нақты міндеттерін шешуге қолдана алуы.
Жолдауда көтерілген энергетикалық қауіпсіздік мәселесі де университет жұмысына тікелей қатысты. Жаңа өндірістерге, цифрлық экономикаға, өсіп келе жатқан қалаларға сенімді энергия қажет. Сондықтан энергетик мамандардың даярлығы елдің ұзақ мерзімді дамуын айқындайды.
ЕҰУ-да электр энергетикасы, жылу энергетикасы, жасыл энергетика технологиялары бағыттарында мамандар даярланады. «Дубна» университетімен ядролық физика бойынша қос дипломды бағдарлама жүзеге асырылады.
Бұл бағыттар еліміздің энергетикалық және ғылыми әлеуетін нығайтатын мамандарды қалыптастыруға мүмкіндік береді. Ғалымдарымыз сутегін өндіру мен сақтау технологияларын, қатты оксидті отын элементтеріне арналған материалдарды зерттейді. Энергия үнемдеу, жылу сорғылары арқылы өндірістегі қалдық жылуды қайта пайдалану бағыттарында да ғылыми жұмыстар бар.
Осындай зерттеулер студенттің теориялық білімін нақты технологиялық міндетпен байланыстырады. Президент айқындаған міндеттер университеттерден білім сапасына, түлектің кәсіби дайындығына және ғылымның практикалық нәтижесіне жауап беруді талап етеді.
Біздің міндетіміз — елдің құрылысын жүргізетін, энергиясын өндіретін, инфрақұрылымын сенімді басқаратын, өз еңбегінің адамдар өміріне ықпалын түсінетін мамандар тәрбиелеу.
Ерлан Сыдықов,
Л.Н.Гумилев атындағы ЕҰУ ректоры
