Президент Құрылтай сайлауының негізгі жетістігін атады

Президент Қасым-Жомарт Тоқаев Құрылтайдың алғашқы сессиясында әлемдегі ахуалдың күрделеніп, халықаралық қатынастар жүйесінде тұрақсыздық күшейгенін айтты, деп хабарлайды Egemen.kz.

Қасым-Жомарт Тоқаев ірі мемлекеттер арасындағы өзара сенімге сызат түскенін атап өтіп, бұл жағдай Біріккен Ұлттар Ұйымы мен оның институттарының жұмысына кері әсерін тигізіп отырғандығын жеткізді. Соның салдарынан бүгінде әлемдегі оқиғалар жүйесіз әрі бейберекет сипатқа ие болып, алдағы жағдайды болжау қиындағанын айтты.

«Әлемдегі оқиғалар тасыған селдей жүйесіз, бейберекет, сипатқа ие, алдымызда не боларын болжаудың өзі қиын. Бұл катаклизмдерден елдер мен халықтардың ешбірі тыс қалған жоқ. Мемлекеттердің, әсіресе ірі елдердің арасындағы сенімге селкеу түсті. Бұл БҰҰ мен оның институттарының қызметіне зардабын тигізіп отыр. БҰҰ Қауіпсіздік Кеңесі жаһандағы және аймақтардағы бейбітшілікті, тұрақтылық пен қауіпсіздікті сақтау миссиясын атқара алмай жатыр. Осы аласапыранда өңірлік халықаралық ұйымдар алға шығып, олардың рөлі айтарлықтай артты. Әлемдік аренада «Орта державалар» деп аталатын мемлекеттер бой көрсете бастады. Қазақстан да аталған санатқа кіреді. Сонымен қатар тұрлаусыз әлемде салыстырмалы түрде жаңа үдеріс белең алды. Цифрлық технологиялар мен жасанды интеллект қарыштап дамып жатыр. Бұл үдерістің түптің түбінде қайда апарып соғары беймәлім, тіпті, қазіргі нәтижелердің өзі екіұдай пікір тудырады. Кейде мұны осы технологияны ойлап табатындар да түсіне бермейді. Мәселен, таяу келешекте ядролық қарудың орнын жасанды интеллект құралдары алмастыруы мүмкін деген болжам айтылды. Мұның бәрі әлемнің дамуы заңдылық пен қисыннан ада екенін көрсетеді. Ал оның зардабын келешек ұрпақ тартады», деді Мемлекет басшысы.

Президент әлемде қалыптасып жатқан жаңа аясында Қазақстанды жаңғырту үдерісін жалғастырудың стратегиялық маңызын атап өтті. Сондай-ақ жаһандық өзгерістер қауіп пен белгісіздікпен қатар технологиялық және прогрессивті дамуға жаңа мүмкіндіктер ашып отырғандығын жеткізді.

«Әлемде жаңа тәртіп қалыптасып жатыр. Ол кереғар сипатқа ие: бір жағынан – қауіпті, зиянды, келешегі бұлыңғыр, ал екінші жағынан – прогрессивті, технологиялық, перспективті әрі адамзат тарихындағы елеулі бетбұрыс саналады. Мұндай жағдайда экономика, ғылым, әскери-дипломатия салаларында өзінің егемендігін нақты іспен қорғап, нығайтуға қауқарлы, ең маңыздысы, адам әлеуетін дамытатын мемлекеттер ғана жаңа дәуірге бейімделетіні баршаға түсінікті. Дәл осы себепті мемлекетімізді жан-жақты жаңғырту стратегиялық тұрғыдан маңызды. Мақтангершілік емес, әділін айтсақ, біз жүргізіп жатқан ауқымды реформалардың қарқыны алдағы уақытта үдей түспесе, бәсеңдемейді. Қарапайым тілмен айтқанда, артқа шегінер жол жоқ. Бұл – елеулік жетістік. Қазақ елінде жүргізіліп жатқан реформалардың күн тәртібінде қазіргі, тіпті келешектегі ықтимал жаһандық сын-қатерлер толық мейлінше ескерілген. Бұл – аса маңызды. Басқаша айтқанда, сол сынақтарды еңсеру үшін алдын алу шаралары қабылданады», деді Қасым-Жомарт Тоқаев.

Еске сала кетейік, бүгін 28 тамызда Астанада Құрылтайдың алғашқы сессиясы өтіп жатыр. Жиында Мемлекет басшысы Қасым-Жомарт Тоқаев Құрылтайдың бірінші сессиясының ашылуымен құттықтады.